തൃശ്ശൂര്: ചാലക്കുടിയിലെ ബ്യൂട്ടി പാര്ലര് ഉടമ ഷീല സണ്ണിയെ വ്യാജ ലഹരി കേസില് കുടുക്കിയ ബന്ധു ലിവിയ ജോസ് കസ്റ്റഡിയില്. ഷീല സണ്ണിയുടെ മരുമകളുടെ സഹോദരിയാണ് ലിവിയ ജോസ്. ദുബായില് നിന്ന് മുംബൈയില് വിമാനമിറങ്ങിയപ്പോഴാണ് ഇവര് പിടിയിലായിരിക്കുന്നത്. ലിവിയയെ പിടികൂടാന് ലുക്കൗട്ട് സര്ക്കുലര് പുറത്തിറക്കിയിരുന്നു. ബംഗ്ലൂരുവില് സ്വകാര്യ സ്ഥാപനത്തില് ജോലിക്കാരിയായിരുന്നു ലിവിയ. സഹോദരിയുടെ അമ്മായിയമ്മയായ ഷീല സണ്ണിയെ കുടുക്കാന് വ്യാജ ലഹരി കേസില് പ്രതിയാക്കുകയായിരുന്നു. തുടര്ന്ന് പൊലീസ് ചോദ്യം ചെയ്യാന് വിളിപ്പിച്ചപ്പോള് ദുബായിലേക്ക് പോകുകയായിരുന്നു. ലിവിയയെ നാളെ കേരളത്തില് എത്തിക്കുമെന്ന് പൊലീസ് അറിയിച്ചു.
