മുഖ്യമന്ത്രി പിണറായി വിജയന് ഇന്ന് 76-ാം പിറന്നാള്‍
തിരുവനന്തപുരം: തുടര്‍ഭരണ നിറവില്‍ ഇന്ന് പതിനഞ്ചാം നിയമസഭയുടെ ആദ്യ സമ്മേളനം ചേരുമ്പോള്‍ മുഖ്യമന്ത്രി പിണറായി വിജയന് ഇത് പിറന്നാള്‍ സമ്മാനം. മുഖ്യമന്ത്രിയുടെ 76-ാം പിറന്നാളാണ് ഇന്ന്. എന്നാല്‍ പ്രത്യേക ആഘോഷങ്ങളോ ചടങ്ങുകളോ ഒന്നും ഉണ്ടാകില്ലെന്ന് മുഖ്യമന്ത്രിയുടെ ഓഫീസ് വ്യക്തമാക്കി.
2017ല്‍ ഒന്നാം പിണറായി വിജയന് സര്‍ക്കാരിന്റെ സത്യപ്രതിജ്ഞയുടെ തലേന്നാണ് മുഖ്യമന്ത്രി മെയ് 24ന് തന്റെ പിറന്നാളാണെന്ന് തുറന്നു പറഞ്ഞത്. 1945 മെയ് 24നായിരുന്നു പിണറായി വിജയന്റെ ജനനം. മാര്‍ച്ച് 24നായിരുന്നു മുഖ്യമന്ത്രിയുടെ ജനനമെന്നായിരുന്നു മുന്‍പ് കരുതിയിരുന്നത്. രണ്ട് പ്രളയങ്ങളും കൊവിഡ് 19 മഹാമാരിയും ഉള്‍പ്പെടെയുള്ള പ്രതിസന്ധികള്‍ക്ക് ശേഷവും 99 പേരുടെ അംഗബലവുമായി തുടര്‍ഭരണം യാഥാര്‍ഥ്യമാക്കിയെന്നത് മുഖ്യമന്ത്രിയ്ക്ക് വലിയ നേട്ടമാണ്. 76-ാം പിറന്നാള്‍ ദിനത്തില്‍ നിയമസഭയിലെത്തുമ്പോള്‍ മന്ത്രിസഭയില്‍ മുഖ്യമന്ത്രിയ്‌ക്കൊപ്പമുള്ള 21 മന്ത്രിമാരില്‍ 17 പേരും പുതുമുഖങ്ങളാണ്
രാജ്യത്തെ ഒരേയൊരു ഇടതുപക്ഷ മുഖ്യമന്ത്രിയെന്ന നിലയില്‍ ദേശീയതലത്തിലും പിണറായി വിജയന് ശ്രദ്ധാകേന്ദ്രമാണ്. ജനങ്ങള്‍ മികച്ച തുടര്‍ഭരണം സമ്മാനിച്ചതിന്റെ ആത്മവിശ്വാസമുണ്ടെങ്കിലും കൊവിഡ് 19 സൃഷ്ടിക്കുന്ന കടുത്ത സാമ്പത്തിക ഞെരുക്കത്തിന്റെ കാലത്ത് സംസ്ഥാനത്തെ മുന്നോട്ടു കൊണ്ടുപോകകയെന്നതാണ് അടുത്ത ദൗത്യം. മന്ത്രിസഭയില്‍ താനൊഴികെയുള്ള എല്ലാ മന്ത്രിമാരും മാറിയെങ്കിലും ആഭ്യന്തര വകുപ്പും ഐടി വകുപ്പും മുഖ്യമന്ത്രി തന്നെയാണ് കൈകാര്യം ചെയ്യേണ്ടി വരിക. കൂടാതെ ന്യൂനപക്ഷ ക്ഷേമം, പ്രവാസികാര്യം എന്നീ വകുപ്പുകള്‍ കൂടി മുഖ്യമന്ത്രി ഏറ്റെടുത്തിട്ടുമുണ്ട്.
