ശബരിമല: വ്യാഴാഴ്ച മുതല്‍ സ്‌പോട്ട് ബുക്കിങ്
കൊച്ചി: ശബരിമല ദര്‍ശനത്തിന് വ്യാഴാഴ്ച മുതല്‍ സ്‌പോട്ട് ബുക്കിങ് ആരംഭിക്കും. പത്ത് ഇടത്താവളങ്ങളിലായി ഇതിനുള്ള സൗകര്യം ഏര്‍പ്പെടുത്തിയിട്ടുള്ളതായി ഹൈക്കോടതിയെ സര്‍ക്കാര്‍ അറിയിച്ചു. നേരത്തെ ബുക്ക് ചെയ്യാത്തവര്‍ക്ക് ഈ സൗകര്യം പ്രയോജനപ്പെടുത്താവുന്നതാണ്. വെര്‍ച്വല്‍ ക്യൂ സൗകര്യത്തിനു പുറമേയാണ് സ്‌പോട്ട് ബുക്കിങ് സൗകര്യം ഏര്‍പ്പെടുത്തിയിരിക്കുന്നത്. സ്‌പോട്ട് ബുക്കിങ്ങിനുള്ള സൗകര്യം ഏര്‍പ്പെടുത്തുന്ന കാര്യത്തില്‍ ദേവസ്വവും സര്‍ക്കാരും തീരുമാനമെടുക്കണമെന്ന് ഹൈക്കോടതി നിര്‍ദ്ദേശിച്ചിരുന്നു. സ്‌പോട്ട് ബുക്കിങ് സൗകര്യം എവിടെയൊക്കെ ലഭ്യമാണെന്ന് മാധ്യമങ്ങളിലൂടെ പ്രസിദ്ധീകരിക്കാനും കോടതി നിര്‍ദ്ദേശം നല്കി. വെര്‍ച്വല്‍ ക്യൂ നിയന്ത്രണം ദേവസ്വത്തെ ഏല്‍പ്പിക്കണമെന്നുള്ള ഹര്‍ജി പരിഗണിക്കവെയാണ് കോടതി ഇക്കാര്യം നിര്‍ദ്ദേശിച്ചത്.
ആധാര്‍ കാര്‍ഡ്, വോട്ടര്‍ ഐഡി, പാസ്‌പോര്‍ട്ട് എന്നിവ സ്‌പോട്ട് ബുക്കിങ്ങിനായി ഉപയോഗിക്കാം. വെര്‍ച്വല്‍ ക്യൂ വഴിയുള്ള ബുക്കിങ്ങിന് പാസ്‌പോര്‍ട്ട് ഉപയോഗിക്കാന്‍ കഴിയുന്ന വിധത്തില്‍ സോഫ്‌റ്റ്വെയറില്‍ മാറ്റം വരുത്തുമെന്ന് സര്‍ക്കാര്‍ കോടതിയെ അറിയിച്ചിട്ടുണ്ട്.
അതേസമയം ശബരിമല മണ്ഡല-മകരവിളക്കു തീര്‍ത്ഥാടനം തടസങ്ങളില്ലാതെ ഭംഗിയായി പൂര്‍ത്തിയാക്കുമെന്ന് ദേവസ്വം വകുപ്പ് മന്ത്രി കെ രാധാകൃഷ്ണന് ചൊവ്വാഴ്ച വ്യക്തമാക്കിയിരുന്നു. കാലാവസ്ഥ അനുകൂലമാകുന്നതോടെ കൂടുതല്‍ തീര്‍ത്ഥാടനകര്‍ എത്തിച്ചേരും. തീര്‍ത്ഥാടകര്‍ക്ക് ആവശ്യമായ സൗകര്യം ഉറപ്പുവരുത്തുമെന്ന് മന്ത്രി പറഞ്ഞു.
