എട്ടു പേര്‍ക്കെതിരെ വ്യാജ ബലാത്സംഗ പരാതി; 22കാരി അറസ്റ്റില്‍
ഗുരുഗ്രാം: ഹണി ട്രാപ്പ് കേസില്‍ 22കാരിയായ യുവതി അറസ്റ്റില്‍. 8 പേര്‍ക്കെതിരെ വ്യാജ ബലാത്സംഗ പരാതി നല്കിയ യുവതിയാണ് പൊലീസ് പിടിയിലായത്. കോളജ് വിദ്യാര്‍ത്ഥിനിയായ യുവതിയുടെ മാതാവും ഹണി ട്രാപ്പ് റാക്കറ്റില്‍ ഉള്‍പ്പെട്ടിട്ടുണ്ട്. ഇവരും റാക്കറ്റില്‍ ഉള്‍പ്പെട്ട മറ്റൊരാളും ഒളിവിലാണ്. ഇവര്‍ക്കായുള്ള തെരച്ചില്‍ നടന്നുവരികയാണെന്ന് പൊലീസ് അറിയിച്ചു. അറസ്റ്റ് ചെയ്ത് കോടതിയില്‍ ഹാജരാക്കിയ യുവതി ജുഡീഷ്യല്‍ കസ്റ്റഡിയിലാണ്.
ഹരിയാനയിലെ ഗുരുഗ്രാമിലാണ് സംഭവം. ഒക്ടോബറില്‍ ഒരു സാമൂഹ്യപ്രവര്‍ത്തക യുവതിക്കെതിരെ പരാതിയുമായി സമീപിച്ചതാണ് കേസില്‍ വഴിത്തിരിവായത്. തന്റെ മകന് താമസിക്കാനായി യുവതിയുടെ വീട് വാടകയ്ക്ക് എടുത്തിരുന്നു എന്നും വീട് ഒഴിഞ്ഞതിനു പിന്നാലെ കേസില്‍ കുടുക്കുമെന്ന് യുവതി മകനെ ഭീഷണിപ്പെടുത്തി എന്നുമായിരുന്നു പരാതി. ഫോണ്‍ വിളിച്ചായിരുന്നു ഭീഷണി. ആദ്യമൊക്കെ ഫോണ്‍ വിളിച്ച് സൗഹൃദം സ്ഥാപിച്ച യുവതി പിന്നാലെയാണ് ഭീഷണി തുടങ്ങിയത്. തന്നെ വിവാഹം കഴിക്കണമെന്നും അല്ലെങ്കില്‍ പണം നല്‍കണമെന്നും പറഞ്ഞ യുവതി അതിനു തയ്യാറായില്ലെങ്കില്‍ ബലാത്സംഗക്കേസ് നല്‍കുമെന്നും ഭീഷണിപ്പെടുത്തി. സാമൂഹ്യപ്രവര്‍ത്തകയുടെ പരാതിയിന്മേല്‍ യുവതി അറസ്റ്റിലായി. ചോദ്യം ചെയ്യലില്‍ കഴിഞ്ഞ 15 മാസത്തിനിടെ 8 വ്യാജ ബലാത്സംഗ കേസുകള്‍ നല്‍കിയതായി യുവതി മൊഴിനല്‍കി. ഇതില്‍ ചില കേസുകള്‍ റദ്ദാക്കിയെന്നും പൊലീസ് അറിയിച്ചു. മറ്റ് കേസുകളില്‍ അന്വേഷണം തുടരുകയാണ്.
