തിരുവനന്തപുരം: കേരളത്തില് വേനല് മഴ സജീവമായേക്കും. ബംഗാള് ഉള്ക്കടലില് ന്യൂനമര്ദ്ദം രൂപപ്പെട്ടു. വടക്കന് ശ്രീലങ്കന് തീരത്തിന് സമീപം തെക്കുപടിഞ്ഞാറന് ബംഗാള് ഉള്ക്കടലിലാണ് ന്യൂനമര്ദ്ദം രൂപപ്പെട്ടത്. അടുത്ത 48 മണിക്കൂറിനുള്ളില് ഇത് കൂടുതല് ശക്തിപ്പെടുമെന്നും ഐഎംഡി സൂചന നല്കി. തെക്കുകിഴക്കന് അറബിക്കടലിനും കേരള തീരത്തോടു ചേര്ന്നുള്ള ലക്ഷദ്വീപിനും മുകളിലായി ചക്രവാതചുഴിയും നിലനില്ക്കുന്നു. തെക്കുപടിഞ്ഞാറന് ബംഗാള് ഉള്ക്കടലിലെ ന്യൂനമര്ദ്ദ കേന്ദ്രം മുതല് തെക്കന് തമിഴ്നാട് വഴി തെക്കന് ലക്ഷദ്വീപ് വരെ സമുദ്രനിരപ്പില് നിന്ന് 1.5 മുതല് 4.5 കിലോമീറ്റര് വരെ ഉയരത്തില് മറ്റൊരു ന്യൂനമര്ദ്ദ പാത്തി നിലനില്ക്കുന്നു.
