തിരുവനന്തപുരം: തിരുവനന്തപുരത്ത് പ്രതിപക്ഷ നേതാവ് പിണറായി വിജയന്റെ വീട്ടില് റെയ്ഡിനെത്തിയ ഇഡി ഉദ്യോ?ഗസ്ഥരെ ആക്രമിച്ച സംഭവത്തിലെ പ്രതികളുടെ ചിത്രങ്ങള് സിപിഎം നേതാക്കള്ക്ക് കൈമാറി പൊലീസ്. മുന് കൗണ്സിലര് ആറ്റുകാല് ഉണ്ണി, പാളയം സന്തോഷ്, ആദര്ശ് എന്നിവരുള്പ്പെടെ 10 പ്രതികളുടെ ചിത്രങ്ങളാണ് പൊലീസ് കൈമാറിയിട്ടുള്ളത്. 10 പ്രതികളെയും തിരിച്ചറിഞ്ഞെന്നും ഇവരില് പലരും പാര്ട്ടി ഓഫീസിലുണ്ടെന്നും പൊലീസ് വ്യക്തമാക്കി.
സംഘര്ഷാവസ്ഥ നിലനില്ക്കുന്ന പാളയം ഏരിയ കമ്മിറ്റി ഓഫീസിന് മുന്നില് വന് പൊലീസ് സന്നാഹത്തെയാണ് വിന്യസിച്ചിരിക്കുന്നത്. പ്രവര്ത്തകരെ അറസ്റ്റ് ചെയ്യാന് അനുവദിക്കില്ലെന്നാണ് സിപിഎം നിലപാട്. പാര്ട്ടി ഓഫീസിനുള്ളില് പൊലീസ് കയറാന് അനുവദിക്കില്ലെന്ന് നേതാക്കള് വ്യക്തമാക്കി. സംഘര്ഷം ഒഴിവാക്കാന് സിപിഎം നേതാക്കള് പൊലീസുമായി ചര്ച്ച നടത്തുകയാണ്. പ്രതികളെ പൊലീസ് സ്റ്റേഷനില് ഹാജരാക്കാമെന്നാണ് നേതാക്കള് പറയുന്നത്. പൊലീസ് പിന്മാറണമെന്നും സിപിഎം ആവശ്യപ്പെടുന്നു.
പിണറായി വിജയന്റെ തലസ്ഥാനത്തെ വീട്ടില് റെയ്ഡിനെത്തിയ ഇഡി ഉദ്യോഗസ്ഥര് പരിശോധന കഴിഞ്ഞ് പുറത്തിറങ്ങിയപ്പോഴാണ് സിപിഎം ആക്രമണമുണ്ടായത്. ഇഡിയുടെ വാഹനങ്ങള് അടിച്ചു തകര്ത്തു. ഇഷ്ടികയും വടികളും ഉപയോഗിച്ചായിരുന്നു ആക്രമണം. അതിക്രമത്തില് ഇഡി വാഹനത്തിന്റെ ഡ്രൈവര്ക്ക് കണ്ണിന് പരിക്കേറ്റിട്ടുണ്ട്. ഇദ്ദേഹത്തെ മെഡിക്കല് കോളേജിലേക്ക് മാറ്റിയിരിക്കുകയാണ്.
