ഇന്ധന വിലയില്‍ വീണ്ടും വര്‍ധന;
തിരുവനന്തപുരത്ത് പെട്രോള്‍ വില 94 കടന്നു
കൊച്ചി: കൊവിഡ് പ്രതിസന്ധിക്കിടെ എണ്ണക്കമ്പനികള്‍ ഇന്ധന വില കുത്തനെ ഉയര്‍ത്തുകയാണ്. രാജ്യത്ത് പെട്രോള്‍, ഡീസല്‍ വില ഇന്നും വര്‍ധിപ്പിച്ചു. ഒരു ദിവസത്തെ ഇടവേളയ്ക്ക് ശേഷമാണ് എണ്ണക്കമ്പനികള്‍ ഇന്ധന വില വീണ്ടും കൂട്ടിയത്. വിവിധ നഗരങ്ങളില്‍ പെട്രോളിന് 24 പൈസയും ഡീസലിന് 29 പൈസയുമാണ് ഉയര്‍ന്നത്. ഈ മാസം ഇത് 9-ാമത്തെ തവണയാണ് ഇന്ധന വില കൂട്ടുന്നത്. 9 ദിവസംകൊണ്ട് പെട്രോളിന് രണ്ട് രൂപ 40 പൈസയും ഡീസലിന് രണ്ട് രൂപ 74 പൈസയുമാണ് വര്‍ധിച്ചത്.
കേരളത്തില്‍ ഇന്ന് ഒരു ലിറ്റര്‍ പെട്രോളിന് 94.56 രൂപയാണ് വില. ഡീസലിന് 89.47 രൂപയും. കൊച്ചിയില്‍ പെട്രോള്‍ ലിറ്ററിന് 92.51 രൂപയാണ് വില. ഡീസലിന് 87.49 രൂപയും. കോഴിക്കോട് പെട്രോളിന് 92.90 രൂപയും ഡീസലിന് 87.90 രൂപയുമാണ് ഇന്നത്തെ വില. മെട്രോ നഗരമായ ഡല്‍ഹിയില്‍ ഒരു ലിറ്റര്‍ പെട്രോളിന് 92.58 രൂപയാണ് വില. ഡീസലിന് 83.22 രൂപയും.
കൊവിഡ് രൂക്ഷമായ മുംബൈയിലാണ് ഇന്ധന വില റെക്കോര്‍ഡ് തകര്‍ത്ത് കുതിച്ചുയരുന്നത്. നഗരത്തില്‍ പെട്രോള്‍ വില 100 കടന്നേക്കുമെന്നാണ് വിലയിരുത്തല്‍.ഇന്ന് ഒരു ലിറ്റര്‍ പെട്രോളിന് മുംബൈയില്‍ 98.88 രൂപയാണ് വില. ഡീസലിന് 90.40 രൂപയും.
