പ്രതിപക്ഷ നേതൃ തെരഞ്ഞെടുപ്പ്: താന്‍ അപമാനിതനായി; സോണിയ ഗാന്ധിക്ക് കത്തയച്ച് ചെന്നിത്തല
ദില്ലി:പ്രതിപക്ഷ നേതൃസ്ഥാനത്ത് നിന്ന് തന്നെ അപമാനിച്ച് പുറത്താക്കിയെന്ന് കോണ്‍ഗ്രസ് നേതാവ് രമേശ് ചെന്നിത്തല. പ്രതിപക്ഷ നേതാവ് തെരഞ്ഞെടുപ്പില്‍ താന്‍ അപമാനിതനായി. പുതിയ ആളെ നേരത്തെ നിശ്ചയിച്ചിരുന്നുവെങ്കില്‍ തന്നെ മുന്‍കൂട്ടി അറിയിക്കുന്നതായിരുന്നു ഉചിതം. അറിയിച്ചിരുന്നെങ്കില്‍ താന്‍ സ്വയം പിന്മാറുമായിരുന്നു. ഫലത്തില്‍ തന്നെ ഒഴിവാക്കി അപമാനിക്കുകയാണ് ചെയ്തതെന്നും ചെന്നിത്തല പാര്‍ട്ടി അധ്യക്ഷ സോണിയ ഗാന്ധിക്കയച്ച കത്തില്‍ വ്യക്തമാക്കി.
കഴിഞ്ഞ സര്‍ക്കാരിന്റെ അഴിമതികളെല്ലാം താന്‍ പുറത്തുകൊണ്ടുവന്നിരുന്നു. മികച്ച രീതിയില്‍ പ്രവര്‍ത്തിക്കാന്‍ ആത്മാര്‍ഥമായ ശ്രമം നടത്തി. എന്നാല്‍ പാര്‍ട്ടിയില്‍ നിന്നും തനിക്ക് സ്വീകാര്യത ലഭിച്ചില്ല. സംഘടനാ ദൗര്‍ബല്യമാണ് കോണ്‍ഗ്രസിന്റെ പരാജയത്തിന് പ്രധാന കാരണമെന്നും ചെന്നിത്തല കത്തില്‍ വ്യക്തമാക്കി.ഇക്കാര്യങ്ങളെല്ലാം ഹൈക്കമാന്‍ഡ് നിയോഗിച്ച അശോക് ചവാന്‍ സമിതിക്ക് മുന്നിലും ചെന്നിത്തല വ്യക്തമാക്കിയിരുന്നു. പിന്നാലെയാണ് കത്തയച്ചിരിക്കുന്നത്.
