നേട്ടം കുറിച്ച് വിപണി
വെള്ളിയാഴ്ച്ച നേരിയ നേട്ടത്തില്‍ വിപണി വ്യാപാരം തുടങ്ങി. രാവിലെ ബിഎസ്ഇ സെന്സെക്സ് സൂചിക 84 പോയിന്റ് ഉയര്‍ന്ന് 52,780 എന്ന നിലയിലാണ് വ്യാപാരങ്ങള്‍ക്ക് തുടക്കമിട്ടത്. ദേശീയ സ്റ്റോക്ക് എക്‌സ്‌ചേഞ്ചില്‍ നിഫ്റ്റി ഫിഫ്റ്റി സൂചിക 15,830 നിലയിലും മുന്നേറുന്നുണ്ട്. അംബാനിയുടെ നേതൃത്വത്തില്‍ വാര്‍ഷിക പൊതുയോഗം നടന്നിട്ടും 2 ശതമാനത്തിലേറെ തകര്‍ച്ച റിലയന്‍സില്‍ കാണാം.
രാവിലെ ടാറ്റ സ്റ്റീല്‍, എച്ച്‌സിഎല്‍ ടെക്നോളജീസ്, മാരുതി സുസുക്കി, ടെക്ക് മഹീന്ദ്ര, എസ്ബിഐ, ബജാജ് ഫിന്‍സെര്‍വ്, എച്ച്ഡിഎഫ്‌സി ബാങ്ക്, മഹീന്ദ്ര ആന്‍ഡ് മഹീന്ദ്ര, ഐസിഐസിഐ ബാങ്ക് ഓഹരികള്‍ സെന്സെക്സില് മുന്‍നിരയിലുണ്ട്. റിലയന്‍സിന് പുറമെ ഹിന്ദുസ്താന്‍ യുണിലെവര്‍, ഇന്‍ഡസ്ഇന്‍ഡ് ബാങ്ക്, ടിസിഎസ് ഓഹരികളും നഷ്ടത്തിലാണ് വെള്ളയാഴ്ച്ച ഇടപാടുകള്‍ നടത്തുന്നത്. നിഫ്റ്റിയില്‍ എല്ലാ വ്യവസായ സൂചികകളും നേട്ടത്തില്‍ ചുവടുവെയ്ക്കുന്നുണ്ട്. കൂട്ടത്തില്‍ നിഫ്റ്റി ലോഹം 1.9 ശതമാനം ഉയര്‍ച്ച കുറിച്ച് ഏറ്റവും മുന്നിലുണ്ട്.
192 കമ്പനികള്‍ ഇന്ന് മാര്‍ച്ച് പാദത്തിലെ സാമ്പത്തിക ഫലം പുറത്തുവിടും. ആന്റണി വേസ്റ്റ് ഹാന്‍ഡ്‌ലിങ് സെല്‍, ഫിനോലക്‌സ് ഇന്‍സ്ട്രീസ്, ഇന്ദ്രപ്രസ്ത ഗ്യാസ്, ജെഎസ്ഡബ്ല്യു എനര്‍ജി, റെയില്‍ടെല്‍ കോര്‍പ്പറേഷന്‍ ഓഫ് ഇന്ത്യ ഓഹരികള്‍ ഇൗ നിരയിലുണ്ട്.
