എസ്ബിഐയുടെ അറ്റാദായത്തില്‍ 55.3ശതമാനത്തിന്റെ വര്‍ധനവ്; ലാഭം 6,504 കോടിയായി ഉയര്‍ന്നു
മുംബൈ: നടപ്പ് സാമ്പത്തിക വര്‍ഷത്തെ ആദ്യപാദത്തില്‍ മികച്ച പ്രവര്‍ത്തനഫലം പുറത്തുവിട്ട് സ്റ്റേറ്റ് ബാങ്ക് ഓഫ് ഇന്ത്യ. ഏപ്രില്‍-ജൂണ്‍ പാദത്തില്‍ എസ്ബിഐയുടെ ലാഭം 6,504 കോടിയായി ഉയര്‍ന്നു. അറ്റാദായത്തില്‍ 55.3ശതമാനത്തിന്റെ വര്‍ധനവാണ് രേഖപ്പെടുത്തിയത്.
കഴിഞ്ഞവര്‍ഷത്തെ സമാനകാലയളവിനെ അപേക്ഷിച്ച് ചെലവ് 19.6ശതമാനം കുറഞ്ഞ് 10,051.96 കോടിയായി. മറ്റ് വരുമാനയിനത്തില്‍ 48.5ശതമാനം വര്‍ധനവും ബാങ്കിന് നേടാനായി. പലിശ വരുമാനം 3.7ശതമാനം ഉയര്‍ന്ന് 27,638 കോടി രൂപയുമായി.
അതേസമയം, നിഷ്‌ക്രിയ ആസ്തിയില്‍ മുന്‍പാദത്തെ അപേക്ഷിച്ച് വര്‍ധനവ് രേഖപ്പെടുത്തി. മുന്‍പാദത്തെ 4.98ശതമാനത്തില്‍ നിന്ന് 5.32ശതമാനമായാണ് വര്‍ധന. കോവിഡ് രോഗ വ്യാപനത്തെതുടര്‍ന്ന് പ്രാദേശികമായി അടച്ചിട്ടതുമൂലമാണിതെന്നാണ് വിലയിരുത്തല്‍. കിട്ടാക്കടം മുന്‍പാദത്തെ 1.50 ശതമാനത്തില്‍നിന്ന് 1.77ശതമാനമായും ഉയര്‍ന്നു.
