കണ്ണൂര്‍: ട്രെയിന്‍ തീവയ്പ് കേസില്‍ പിടിയിലായ പ്രതി ഉത്തര്‍പ്രദേശ് സ്വദേശിയാണെന്ന് വ്യക്തമാക്കി പൊലീസ്. ഇയാളുടെ അറസ്റ്റ് രേഖപ്പെടുത്തിയേക്കും. നേരത്തെ ട്രെയിനിന് മുന്നില്‍ ചവര്‍ കൂട്ടിയിട്ട് കത്തിച്ച കേസില്‍ ഇയാളെ കസ്റ്റഡിയിലെടുത്ത് വിട്ടയച്ചിരുന്നു. ഇന്നലെ ഷര്‍ട്ട് ധരിക്കാതെ പ്രതി കണ്ണൂര്‍ റെയില്‍വെ സ്റ്റേഷന്റെ ഭാഗത്തുണ്ടായിരുന്നു. ഇയാളെ ബിപിസിഎല്ലിലെ ഉദ്യോഗസ്ഥനാണ് കണ്ടത്. ഈ സാക്ഷി പ്രതിയെ തിരിച്ചറിഞ്ഞു. ചോദ്യം ചെയ്യലില്‍ പ്രതി കുറ്റംസമ്മതിച്ചെന്നാണ് സൂചന. എന്നാല്‍ പൊലീസ് ഇക്കാര്യം വ്യക്തമാക്കിയിട്ടില്ല.
കണ്ണൂര്‍ റെയില്‍വെ സ്റ്റേഷന് സമീപത്ത് സ്ഥിരമായി ഉണ്ടാകാറുള്ള വ്യക്തി ആണ് ഇയാളാണെന്നാണ് സാക്ഷി മൊഴി. നേരെത്തെ റയില്‍വേ സ്റ്റേഷന് സമീപം ചവര്‍ കൂട്ടിയിട്ട് കത്തിച്ച് ഭീതി ഉണ്ടാക്കിയതിനാണ് ഇയാളെ പൊലീസ് കസ്റ്റഡിയിലെടുത്തത്. എന്നാല്‍ പൊലീസ് ഇയാളെ വിട്ടയക്കുകയായിരുന്നു. കസ്റ്റഡിയില്‍ ഉള്ള ആള്‍ ഇന്നലെ ട്രാക്കില്‍ ഉണ്ടായിരുന്നതായി ദൃക്സാക്ഷി മൊഴി നല്‍കിയിട്ടുണ്ട്.
പ്രതി സാമൂഹ്യവിരുദ്ധ പ്രവര്‍ത്തനം നടത്തുന്നയാളാണെന്നാണ് വിവരം. ഇയാള്‍ക്ക് തീവ്രവാദ ബന്ധമുണ്ടോയെന്ന് സ്ഥിരീകരിച്ചിട്ടില്ല. അത്തരം പ്രവര്‍ത്തികളില്‍ ഇയാള്‍ മുന്‍പ് ഏര്‍പ്പെട്ടിരുന്നോയെന്നത് വിശദമായ അന്വേഷണത്തില്‍ മാത്രമേ വ്യക്തമാകൂ. എന്നാല്‍ പൊലീസ് ഇതുവരെ പ്രതിയുടെ പേരടക്കമുള്ള വിവരങ്ങള്‍ പുറത്തുവിട്ടിട്ടില്ല.
കണ്ണൂര്‍ - ആലപ്പുഴ എക്‌സിക്യൂട്ടീവ് എക്‌സ്പ്രസ്സിന്റെ ഒരു ബോഗി ഇന്നലത്തെ ആക്രമണത്തില്‍ കത്തിനശിച്ചിരുന്നു. ബോഗിക്കകത്ത് ശുചിമുറിയിലടക്കം കല്ലുകളിട്ട ശേഷം ബോഗിയിലാകെ ഇന്ധനമൊഴിച്ച് കത്തിക്കുകയായിരുന്നുവെന്നാണ് സംശയം. ഇന്നലെ രാത്രി 11.07 ന് യാത്ര അവസാനിപ്പിച്ച ട്രെയിനായിരുന്നു ഇത്. 11.45 ഓടെ കണ്ണൂര്‍ സ്റ്റേഷനിലെ എട്ടാം ട്രാക്കില്‍ ട്രെയിന്‍ നിര്‍ത്തി. തീവണ്ടിയുടെ ഏറ്റവും പുറകിലെ കോച്ചില്‍ പുലര്‍ച്ചെ ഒരു മണിക്ക് ശേഷം കയറിയ അക്രമി പുലര്‍ച്ചെ 1. 27നാണ് തീയിട്ടത്. ഫയര്‍ ഫോഴ്‌സെത്തി തീ അണക്കുമ്പോഴേക്കും ഒരു കോച്ച് പൂര്‍ണ്ണമായി കത്തിയമര്‍ന്നു. ഒരു മണിക്കൂര്‍ പരിശ്രമിച്ചാണ് ഫയര്‍ഫോഴ്‌സ് തീ നിയന്ത്രണ വിധേയമാക്കിയത്. തീവണ്ടിയ്ക്ക് തീവെച്ചതെന്ന് കരുതുന്നയാളുടെ സിസിഡിവി ദൃശ്യം പൊലീസിന് ലഭിച്ചിട്ടുണ്ട്.
