പള്‍സ് ഓക്സി മീറ്ററിന് അടിസ്ഥാന വിലയില്ല;
നടപടി എടുക്കാനാകാതെ ഡ്രഗ്സ് കണ്‍ട്രോള്‍ വിഭാഗം
കോഴിക്കോട്:മെഡിക്കല്‍ ഉപകരണമായ പള്‍സ് ഓക്സി മീറ്ററിന് അടിസ്ഥാന വില നിശ്ചയിക്കാത്തതിനാല്‍ നടപടിയെടുക്കാന്‍ കഴിയാതെ ഡ്രഗ്സ് കണ്‍ട്രോള്‍ വിഭാഗം. എംആര്‍പി ഉയര്‍ന്ന നിരക്ക് രേഖപ്പെടുത്തിയതിനാല്‍ വലിയ കൊള്ളയാണ് മൊത്ത/ചില്ലറ വില്പന ശാലകളില്‍ നടക്കുന്നത്.
കേരളത്തിലെ വ്യാപാര ശാലകളില്‍ പള്‍സ് ഓക്സി മീറ്ററിന് പുറത്തുള്ള സ്റ്റിക്കറില്‍ പതിപ്പിച്ചിരിക്കുന്നത് 3600 രൂപ വരെയാണ്. എന്നാല്‍ എംആര്‍പി നിരക്കായതിനാല്‍ അതിനെക്കാള്‍ ഉയര്‍ന്ന വില ഈടാക്കിയാലേ ഡ്രഗ്സ് കണ്‍ട്രോള്‍ വിഭാഗത്തിന് നടപടി എടുക്കാനാകൂ. 10 ശതമാനം ലാഭമാണ് മൊത്ത വില്പനക്കാര്‍ എടുക്കുന്നത്. ഓരോ തവണയും ചൈനയില്‍ നിന്ന് വിവിധ കമ്പനികളുടെ പേരില്‍ കേരളത്തിലേക്ക് ഈ ഉപകരണങ്ങള്‍ എത്തുമ്പോള്‍ സാധാരണക്കാര്‍ക്ക് ഇത് വാങ്ങുക അപ്രാപ്യമാണ്.
