ടെഹ്റാന്: ഇറാനിലെ മൂന്ന് ആണവകേന്ദ്രങ്ങളില് അമേരിക്കയുടെ ആക്രമണം. ഫോര്ദോ, നതാന്സ്, ഇസ്ഹാന് കേന്ദ്രങ്ങളിലാണ് ആക്രമണം നടത്തിയത്. ആക്രമണം പൂര്ത്തിയാക്കി യുദ്ധ വിമാനങ്ങള് മടങ്ങിയെന്ന് യു.എസ് പ്രസിഡന്റ് ഡോണള്ഡ് ട്രംപ് പറഞ്ഞു. ഇറാന് - ഇസ്രയേല് സംഘര്ഷം തുടങ്ങി പത്താം നാള് ആണ് അമേരിക്ക നേരിട്ട് ആക്രമണം നടത്തിയത്. എത്രത്തോളം നാശനഷ്ടമുണ്ടായിട്ടുണ്ടെന്ന് ഇപ്പോള് വ്യക്തമല്ല.
അമേരിക്കയുടെ യുദ്ധ വിമാനങ്ങള് പസഫിക് സമുദ്രത്തിന് കുറുകെ പറന്നെന്ന റിപ്പോര്ട്ടുകള് പുറത്തുവന്നതിന് പിന്നാലെയാണ് ആക്രമണം. ഉഗ്ര പ്രഹര ശേഷിയുള്ള യു എസ് വ്യോമസേന ബി 2 ബോംബര് വിമാനങ്ങള് അമേരിക്കയിലെ സൈനിക താവളത്തില് നിന്ന് പറന്നുയര്ന്ന് പസഫിക് സമുദ്രത്തിന് കുറുകെ പോവുകയായിരുന്നു.
യുദ്ധത്തില് അമേരിക്ക കരസേനയെ വിന്യസിക്കില്ലെന്നും ഇറാന്റെ ആണവ കേന്ദ്രങ്ങളെ നിര്വീര്യമാക്കാന് ഇസ്രയേലിന് ഒറ്റക്ക് സാധിക്കില്ലെന്നും നിലവില് ആക്രമണങ്ങള് നിര്ത്തിവെക്കാന് ഇസ്രായേലിനോട് പറയാനാകില്ലെന്നും ട്രംപ് കഴിഞ്ഞ ദിവസം വിശദീകരിച്ചിരുന്നു. ഇറാന്റെ ആണവ പദ്ധതികളെ കുറിച്ച് യു എസ് രഹസ്യാന്വേഷണ മേധാവി തുള്സി ഗാബാര്ഡ് ജനപ്രതിനിധി സഭയില് അവതരിപ്പിച്ച റിപ്പോര്ട്ടടക്കം തള്ളിക്കൊണ്ടാണ് ട്രംപ് സംസാരിച്ചത്. ഇറാന് അടുത്തെങ്ങും ആണവായുധം നിര്മിക്കില്ലെന്ന റിപ്പോര്ട്ടാണ് ട്രംപ് തള്ളിക്കളഞ്ഞത്.
