പൊലീസ് ചോദ്യം ചെയ്ത് വിട്ടയച്ച വിദ്യാര്‍ത്ഥിയെ
ദുരൂഹസാഹചര്യത്തില്‍ മരിച്ച നിലയില്‍ കണ്ടെത്തി
ചെന്നൈ: പൊലീസ് ചോദ്യം ചെയ്ത് വിട്ടയച്ച കോളജ് വിദ്യാര്‍ത്ഥിയെ ദുരൂഹസാഹചര്യത്തില്‍ മരിച്ച നിലയില്‍ കണ്ടെത്തി. തമിഴ്നാട് നീര്‍കൊഴിയെന്തല്‍ സ്വദേശി എല്‍ മണികണ്ഠനെയാണ് (21) മരിച്ച നിലയില്‍ കണ്ടെത്തിയത്. കഴിഞ്ഞ ദിവസം രാത്രി മണികണ്ഠനും സുഹൃത്തുക്കളും സഞ്ചരിച്ചിരുന്ന ബൈക്കുകള്‍ പൊലീസ് തടഞ്ഞു. സുഹൃത്തുക്കള്‍ ബൈക്ക് നിര്‍ത്തിയെങ്കിലും മണികണ്ഠന്‍ നിര്‍ത്താതെ പോയി.
മണികണ്ഠന്റെ ബൈക്ക് പിന്തുടര്‍ന്ന പൊലീസ് സംഘം ചോദ്യം ചെയ്യലിനായി സ്റ്റേഷനിലേക്ക് കൊണ്ടുപോയി. ചോദ്യം ചെയ്യലിന് ശേഷം ബന്ധുക്കളെ വിളിച്ചുവരുത്തി വീട്ടിലേക്ക് പറഞ്ഞുവിട്ടുവെങ്കിലും മണിക്കൂറുകള്‍ക്കകം മണികണ്ഠനെ വീട്ടില്‍ ദുരൂഹസാഹചര്യത്തില്‍ മരിച്ച നിലയില്‍ കണ്ടെത്തുകയായിരുന്നു.
മൃതദേഹം പോസ്റ്റുമോര്‍ട്ടത്തിനായി മുതുക്കുളത്തൂര്‍ സര്‍ക്കാര്‍ ആശുപത്രിയിലേക്ക് മാറ്റി. തന്നെ പൊലീസ് മര്‍ദ്ദിച്ചുവെന്ന് മണികണ്ഠന്‍ കുടുംബാംഗങ്ങളോട് പറഞ്ഞിരുന്നുവെന്നും, പൊലീസ് ക്രൂരമായി പീഡിപ്പിച്ചതിനെ തുടര്‍ന്നാണ് മണികണ്ഠന്‍ മരിച്ചതെന്നുമാണ് കുടുംബത്തിന്റെ ആരോപണം.
അബോധാവസ്ഥയില്‍ കണ്ടെത്തിയ മണികണ്ഠനെ ആശുപത്രിയിലെത്തിച്ചുവെങ്കിലും ജീവന് രക്ഷിക്കാന്‍ സാധിച്ചില്ലയെന്നാണ് ബന്ധുക്കള്‍ പറഞ്ഞത്. സംഭവത്തെ തുടര്‍ന്ന് ബന്ധുക്കളും നാട്ടുകാരും ആശുപത്രിക്ക് മുമ്പില്‍ പ്രതിഷേധം നടത്തി. പൊലീസിനെതിരെ അന്വേഷണം നടത്തി എത്രയും പെട്ടെന്ന് നടപടിയെടുക്കണമെന്നാണ് ആവശ്യം.
