കോഴിക്കോട്: കൊച്ചിയില്‍ ഇന്നലെ പെയ്തത് ആസിഡ് മഴയെന്ന് വിദഗ്ധര്‍. തുടക്കത്തില്‍ പെയ്ത മഴത്തുള്ളികളില്‍ സല്‍ഫ്യൂരിക് ആസിഡിന്റെ സാന്നിധ്യം ഉണ്ടായിരുന്നുവെന്ന് പരിശോധനയില്‍ കണ്ടെത്തിയെന്ന് ശാസ്ത്രനിരീക്ഷകന്‍ രാജഗോപാല്‍ കമ്മത്ത് പറഞ്ഞു. എന്നാല്‍ ആസിഡ് മഴ പെയ്തുവെന്ന് സ്ഥിരീകരിച്ചിട്ടില്ലെന്ന് മലിനീകരണ നിയന്ത്രണ ബോര്‍ഡ് അറിയിച്ചു. ( kochi acid rain not confirmed says pollution control board )
ശേഖരിച്ച മഴത്തുള്ളികളുടെ വിശദമായ പരിശോധന നടത്തിയ ശേഷമാകും ഇക്കാര്യം സ്ഥിരീകരിക്കുക. ബ്രഹ്മപുരം തീപിടുത്തത്തിനു ശേഷമുള്ള ആദ്യമഴ സൂക്ഷിക്കണം എന്ന മുന്നറിയിപ്പ് നേരത്തെ മലിനീകരണ നിയന്ത്രണ ബോര്‍ഡ് നല്‍കിയിരുന്നു. കൊച്ചിയിലെ വായുവിന്റെ ഗുണനിലവാരസൂചിക ഏറ്റവും മോശം നിലയില്‍ എത്തിയിരുന്നു. കൂടാതെ രാസബാഷ്പ മാലിന്യമായ പിഎം 2.5 ന്റെ തോതും വലിയ തോതില്‍ വര്‍ദ്ധിച്ചിരുന്നു. ഈ സാഹചര്യത്തില്‍ ആസിഡ് മഴയ്ക്ക് സാധ്യതയുണ്ടെന്നായിരുന്നു മുന്നറിയിപ്പ്.
ഇതിന് പിന്നാലെയാണ് ഇന്നലെ രാത്രിയോടെ കൊച്ചിയില്‍ വ്യാപകമായി ഇടിമിന്നലോടെ മഴപെയ്തത്. ആദ്യ മഴ കൊള്ളരുതെന്നും മറ്റുമുള്ള നിര്‍ദേശം അധികൃതര്‍ നേരത്തെ തന്നെ നല്‍കിയിരുന്നു. പലയിടത്തും മഴവെള്ളം പതഞ്ഞ രീതിയില്‍ കാണപ്പെട്ടതായും റിപ്പോര്‍ട്ടുണ്ട്.
