വണ്‍പ്ലസ് നോര്‍ഡ് എത്തി ഒരു വര്ഷം! നോര്‍ഡ് 2 പണിപ്പുരയില്‍
ചൈനീസ് പ്രീമിയം സ്മാര്ട്ട്ഫോണ് നിര്‍മ്മാതാക്കളായ വണ്‍പ്ലസ് കഴിഞ്ഞ വര്ഷം ജൂണിലാണ് തങ്ങളുടെ ആദ്യ വിലക്കുറവുള്ള സ്മാര്‍ട്ട്‌ഫോണായി നോര്‍ഡിനെ അവതരിപ്പിച്ചത്. 6 ജിബി റാം + 64 ജിബി സ്റ്റോറേജ്, 8 ജിബി റാം + 128 ജിബി സ്റ്റോറേജ്, 12 ജിബി റാം + 256 ജിബി സ്റ്റോറേജ് എന്നിങ്ങനെ മൂന്ന് പതിപ്പുകളില്‍ വില്പനക്കെത്തിയ നോര്‍ഡിന് യഥാക്രമം 24,999 രൂപ, 27,999 രൂപ, 29,999 രൂപ എന്നിങ്ങനെയാണ് വിലകള്‍. ആപ്പിള്‍ ഐഫോണികളോട് മത്സരിച്ചിരുന്ന വണ്‍പ്ലസ് ബ്രാന്‍ഡില്‍ നിന്നുള്ള വിലക്കുറവുള്ള ഫോണ്‍ മികച്ച വിജയം നേടി. ബ്രാന്‍ഡിനെ ജനകീയമാകുന്നതില്‍ ചുക്കാന്‍ പിടിച്ച നോര്‍ഡ് എത്തി ഒരു വര്ഷം തികയുമ്പോള്‍ നോര്‍ഡ് 2 അവതരിപ്പിക്കാന്‍ ഒരുങ്ങുകയാണ് വണ്‍പ്ലസ്.
വണ്‍പ്ലസ് ഔദ്യോഗികമായി നോര്‍ഡ് 2-ന്റെ വരവ് സ്ഥിരീകരിച്ചിട്ടില്ല. വണ്‍പ്ലസ് യുകെ വിപണിയില്‍ തങ്ങളുടെ ഫോണ്‍ വാങ്ങുന്നവര്‍ക്കായി ഗെയിമിങ് പ്ലാറ്റ്‌ഫോമായ സ്റ്റേഡിയ പ്രീമിയര്‍ എഡിഷന്‍ വിലക്കുറവില്‍ നല്‍കുന്ന ഓഫര്‍ പ്രഖ്യാപിച്ചിട്ടുണ്ട്. ഏതൊക്കെ ഫോണുകള്‍ക്കാണ് ഈ ഓഫര്‍ ബാധകം എന്ന് വിവരിക്കുന്ന ഭാഗത്ത് വണ്‍പ്ലസ് നോര്‍ഡ് 2 പ്രദര്‍ശിപ്പിച്ചിട്ടുണ്ട്. ഇതാണ് പുതിയ നോര്‍ഡിന്റെ വരവ് സ്ഥിരീകരിക്കുന്നത്.
റിപോര്‍ട്ടുകള്‍ അനുസരിച്ച് മീഡിയടെക് ഡിമെന്‍സിറ്റി 1200 SoC പ്രോസസ്സര്‍ ആയിരിക്കും വണ്‍പ്ലസ് നോര്‍ഡ് 2ന്. ഇതാണ് ഇപ്പോള്‍ വിപണിയിലുള്ള നോര്‍ഡും നോര്‍ഡ് 2വും തമ്മിലുള്ള പ്രധാന മാറ്റം. അങ്ങനെയെങ്കില്‍ ക്വാല്‍കോം സ്‌നാപ്പ്ഡ്രാഗണ്‍ SoC പ്രോസസ്സര്‍ ഉപയോഗിക്കാത്ത ആദ്യ വണ്‍പ്ലസ് ഫോണ്‍ ആവും നോര്‍ഡ് 2. ഈ പുതിയ പ്രോസസ്സര്‍ ഉപയോഗിച്ച് ഇന്ത്യയിലെത്തുന്ന ആദ്യ ഫോണുകളില്‍ ഒന്നാവും വണ്‍പ്ലസ് നോര്‍ഡ് 2.
90Hz റിഫ്രഷ് റേറ്റുള്ള 6.44-ഇഞ്ച് ഫുള്‍ എച്ഡി+ (1,080x2,400 പിക്‌സല്‍) ഫ്‌ലൂയിഡ് അമോലെഡ് ഡിസ്‌പ്ലേയാണ് വണ്‍പ്ലസ് നോര്‍ഡിന്. വണ്‍പ്ലസ് നോര്‍ഡ് 2-ല്‍ അതെ സമയം ഡിസ്പ്ലേയുടെ വലിപ്പം കൂടാന്‍ സാധ്യത ഇല്ല എങ്കിലും റിഫ്രഷ് റേറ്റ് 120Hz ആയി ഉയര്‍ന്നേക്കാം. 48 മെഗാപിക്സല് സോണി IMX586 പ്രൈമറി സെന്‍സര്‍ 64 മെഗാപിക്സല് ക്യാമെറയ്ക്ക് വഴിമാറും. മെഗാപിക്സല് സെക്കന്ററി സെന്‍സര്‍ (അള്‍ട്രാ-വൈഡ്-ആംഗിള്‍ ലെന്‍സ്), 5 മെഗാപിക്സല് ഡെപ്ത് സെന്‍സര്‍, 2 മെഗാപിക്സല് f/2.4 മാക്രോ ലെന്‍സ് എന്നിവ അതെ സമയം മാറ്റമില്ലാതെ തുടരും.
30W വാര്‍പ് ഫാസ്റ്റ് ചാര്‍ജിങ് സപ്പോര്‍ട്ടുള്ള 4,115mAh ബാറ്ററിയ്ക്ക് പകരം നോര്‍ഡ് 2ല്‍ 5000mAh ബാറ്ററി കുറഞ്ഞത് പ്രതീക്ഷിക്കാം. ചാര്‍ജിങ് സ്പീഡും കൂടും. ചുരുക്കത്തില്‍ നോര്‍ഡിനെ സമഗ്രമായി പരിഷ്‌ക്കരിച്ച മോഡല്‍ ആയിരിക്കും വണ്‍പ്ലസ് നോര്‍ഡ് 2.
