സിറ്റി ബാങ്ക് ഇന്ത്യയിലെ പ്രവര്‍ത്തനം നിര്‍ത്തുന്നു
ഇന്ത്യയും ചൈനയും ഉള്‍പ്പെടെ 13 രാജ്യങ്ങളിലെ ഉപഭോക്തൃ ബാങ്കിങ് സേവനങ്ങള്‍ സിറ്റി ബാങ്ക് നിര്‍ത്തുന്നു. താരതമ്യേന ചെറിയ വിപണികളിലെ സേവനം നിര്‍ത്തുന്നതിന്റെ ഭാഗമായാണ് സിറ്റി ബാങ്ക് ഇന്ത്യയിലെ പ്രവര്‍ത്തനം അവസാനിപ്പിക്കുന്നത്. ക്രെഡിറ്റ് കാര്‍ഡ്, റീട്ടെയില്‍ ബാങ്കിങ്, ഭവന വായ്പ, ആസ്തി കൈകാര്യം ഉള്‍പ്പെടെയുള്ള പ്രവര്‍ത്തനമാണ് ബാങ്ക് അവസാനിപ്പിക്കുക. 1902 മുതല്‍ ഇന്ത്യയില്‍ പ്രവര്‍ത്തനമാരംഭിച്ച സിറ്റി ബാങ്കിന് രാജ്യത്തുടനീളം 35 ശാഖകളാണുള്ളത്. ഇതിലെല്ലാമായി 19,000 ജീവനക്കാരുമുണ്ട്.
നിയന്ത്രണ അതോറിറ്റികളുടെ അനുമതി ലഭിക്കുന്ന മുറയ്ക്കായിരിക്കും പ്രവര്‍ത്തനം നിര്‍ത്തുക. അതുവരെ സേവനം തുടരുമെന്നും കമ്പനിയുടെ തീരുമാനം ജീവനക്കാരെയോ ഇന്ത്യയിലെ പ്രവര്‍ത്തനങ്ങളെയോ ബാധിക്കില്ലെന്നും സിറ്റി ഇന്ത്യ ചീഫ് എക്‌സിക്യൂട്ടീവ് അഷു ഖുല്ലാര്‍ പറഞ്ഞു. സിറ്റി ബാങ്കിന്റെ വില്പന നടക്കുകയാണ്. വില്പന പൂര്‍ത്തിയാകുന്നത് വരെ ഇന്ത്യയിലെ ഉപഭോക്താക്കളെയും സ്റ്റാഫുകളെയും ഇത് ബാധിക്കില്ലെന്നും അദ്ദേഹം കൂട്ടിച്ചേര്‍ത്തു. സിറ്റി ബാങ്കിന് ഇന്ത്യയില്‍ 2.9 കോടി റീട്ടെയില്‍ ഉപഭോക്താക്കളും 1.2 കോടി ബാങ്ക് അക്കൗണ്ടുകളും 2.2 കോടി ക്രെഡിറ്റ് കാര്‍ഡ് അക്കൗണ്ടുകളുമാണുള്ളത്.
അതേസമയം ബാങ്കിങ് സേവനങ്ങള്‍ നിര്‍ത്തിയാലും മുംബൈ, ബെംഗളൂരു, ചെന്നൈ, ഗുരുഗ്രാം എന്നിവിടങ്ങളിലെ സിറ്റി ബാങ്കിന്റെ പ്രധാന ഓഫീസുകള്‍ പ്രവര്‍ത്തിക്കും. ഇന്ത്യ ഉള്‍പ്പടെയുള്ള രാജ്യങ്ങളിലെ ബിസിനസ് അവസാനിപ്പിക്കുന്നതോടെ സിംഗപ്പൂര്‍, ഹോങ്കോങ്, ലണ്ടന്‍, യുഎഇ എന്നീ നാല് വിപണികളില്‍ ആഗോള ഉപഭോക്തൃ ബാങ്കിങ് ബിസിനസ് കേന്ദ്രീകരിക്കാനാണ് കമ്പനിയുടെ പദ്ധതി. ഓസ്ട്രേലിയ, ബഹ്റൈന്, ചൈന, ഇന്തോനേഷ്യ, കൊറിയ, മലേഷ്യ, ഫിലിപ്പീന്‍സ്, പോളണ്ട്, റഷ്യ, തായ്വാന്‍, തായ്‌ലന്‍ഡ്, വിയറ്റ്‌നാം എന്നിവയാണ് സിറ്റി ബാങ്ക് പ്രവര്‍ത്തനം നിര്‍ത്തുന്ന മറ്റ് 12 രാജ്യങ്ങള്‍. കൂടുതലും ഏഷ്യന്‍ രാജ്യങ്ങളിലെ പ്രവര്‍ത്തനമാണ് കമ്പനി നിര്‍ത്തുന്നത്.
