തിരുവനന്തപുരം: വന്ദേ ഭാരത് എക്സ്പ്രസില് സ്പീക്കര്‍ എ എന്‍ ഷംസീറിന്റെ സുഹൃത്തിന്റെ അനധികൃത യാത്ര ചോദ്യം ചെയ്ത ടിടിഇക്കെതിരായ അച്ചടക്ക നടപടി പിന്‍വലിച്ച് റെയില്‍വേ. യൂണിയനുകള്‍ സമ്മര്‍ദം ശക്തമാക്കിയതിന് പിന്നാലെയാണ് റെയില്‍വേയുടെ തീരുമാനം. സ്പീക്കര്‍ എ എന്‍ ഷംസീറിന്റെ പരാതി പ്രകാരമായിരുന്നു വന്ദേഭാരതിലെ ജോലിയില്‍ നിന്ന് നീക്കിയത്. സംഭവം വന്‍ വിവാദമാകുകയും യൂണിയനുകള്‍ പ്രതിഷേധവുമായി രംഗത്തെത്തുകയും ചെയ്തതോടെ അധികൃതര്‍ തീരുമാനം പിന്‍വലിക്കുകയായിരുന്നു.
കഴിഞ്ഞ വെള്ളിയാഴ്ച സംഭവം നടക്കുന്നത്. കുടംബത്തോടൊപ്പം വന്ദേ ഭാരതിന്റെ എക്‌സിക്യൂട്ടീവ് ക്ലാസില്‍ തിരുവനന്തപുരത്തേക്ക് പോകുകയായിരുന്നു സ്പീക്കര്‍ എ.എന്‍ ഷംസീര്‍. ഷംസീറിനൊപ്പം ഗണേശ് എന്ന സുഹൃത്തും കൂടെയുണ്ടായിരുന്നു. ചെയര്‍ കാര്‍ ടിക്കറ്റ് മാത്രമാണ് ഇദ്ദേഹത്തിനുണ്ടായിരുന്നത്. തൃശൂര്‍ എത്തിയപ്പോള്‍ ചീഫ് ടിടിഇ ജി എസ് പത്മകുമാര്‍, ഗണേശിനോട് ചെയര്‍ കാറിലേക്ക് മാറാന്‍ ആവശ്യപ്പെട്ടു. എന്നാല്‍ ഗണേശ് തയ്യാറായില്ല. അങ്ങിനെയെങ്കില്‍ ടിക്കറ്റ് അപ്‌ഗ്രേഡ് ചെയ്യണമെന്ന് ടിടിഇ പറഞ്ഞു. അതിനും ഗണേശ് തയ്യാറായില്ല. തുടര്‍ന്ന് എത്രയും വേഗം മാറണം എന്നാവശ്യപ്പെട്ട് ടിടിഇ മടങ്ങി. പിന്നീട് ട്രെയിന് കോട്ടയത്ത് എത്തിയതോടെ ടിടിയും ഗണേശും തമ്മില് ഇതേ ചൊല്ലി തര്‍ക്കമായി. ബഹളം മൂത്തപ്പോള്‍ സ്പീക്കര്‍ എ എന്‍ ഷംസീറും ഇടപെട്ടു. ടിടിഇ രാഷ്ട്രീയം കളിക്കുന്നു എന്നായിരുന്നു ഷംസീറിന്റെ ആരോപണം.
യാത്ര അവസാനിച്ചതിന് പിന്നാലെ സ്പീക്കര്‍, ഡിവിഷണല്‍ മാനേജര്‍ക്ക് പരാതി നല്‍കുകയായിരുന്നു. തന്നോട് മോശമായി പെരുമാറി എന്നായിരുന്നു ഷംസീറിന്റെ പരാതി. തുടര്‍ന്ന് ടിടിഇ പത്മകുമാറിനെ വന്ദേഭാരത് എക്‌സപ്രസിലെ ജോലിയില്‍ നിന്ന് അധികൃതര്‍ ഒഴിവാക്കി. ഇതോടെ യൂണിയനുകളും ഇടപെട്ടു. ജോലി ചെയ്തതിന് ഉദ്യോഗസ്ഥനെ ശിക്ഷിച്ച നടപടി അംഗീകരിക്കില്ലെന്ന് കാട്ടി എസ് ആര് എം യു, തിരുവനന്തപുരം ഡിവിഷണല്‍ മാനേജര്‍ക്ക് പരാതി നല്കി. സംഭവം വന്‍ വിവാദമായതോടെ അധികൃതര്‍ തീരുമാനം പിന്‍വലിച്ചു. പത്മകുമാറിന് വന്ദേഭാരതില്‍ തന്നെ തുടരാമെന്ന് അറിയിക്കുകയും ചെയ്തു. സ്പീക്കറാണെന്ന് പറഞ്ഞിട്ടും ടിടിഇ ബഹുമാനം കാട്ടിയില്ലെന്നും സ്പീക്കര്‍ക്കെതിരെ മോശം പദപ്രയോഗം നടത്തിയത് കൊണ്ടാണ് പരാതി നല്‍കിയത് എന്നുമാണ് സ്പീക്കറുടെ ഓഫീസ് വിശദീകരിച്ചത്.
