തിരുവനന്തപുരം: ദിവസങ്ങള് നീണ്ട ചര്ച്ചകള്ക്കും അനിശ്ചിതത്വങ്ങള്ക്കും ഒടുവില് വിരാമം. പ്രതിപക്ഷ നേതാവായ വി ഡി സതീശനെ കേരളത്തിന്റെ പുതിയ മുഖ്യമന്ത്രിയായി ഹൈക്കമാന്ഡ് പ്രഖ്യാപിച്ചു. ദില്ലിയില് എഐസിസി വിളിച്ച വാര്ത്താസമ്മേളനത്തിലാണ് സതീശനെ മുഖ്യമന്ത്രിയായി പ്രഖ്യാപിച്ചത്. എഐസിസി നിരീക്ഷകരായ കോണ്ഗ്രസ് ജനറല് സെക്രട്ടറി മുകുള് വാസ്നിക്, അജയ് മാക്കന്, കേരളത്തിന്റെ ചുമതലയുള്ള എഐസിസി ജനറല് സെക്രട്ടറി ദീപാദാസ് മുന്ഷി എന്നിവര് വാര്ത്താസമ്മേളനത്തില് പങ്കെടുത്തത്. നിയമസഭ തെരഞ്ഞെടുപ്പില് യുഡിഎഫ് നേടിയ വന് വിജയത്തിന് പിന്നാലെ മുഖ്യമന്ത്രി സ്ഥാനത്തെ ചുറ്റിപ്പറ്റി നടന്ന ചര്ച്ചകള്ക്കും നേതൃത്വ തര്ക്കങ്ങള്ക്കും ഒടുവിലാണ് ഹൈക്കമാന്ഡിന്റെ അന്തിമ തീരുമാനം.
തെരഞ്ഞെടുപ്പ് ഫലത്തിന് പിന്നാലെ 'ആരാണ് മുഖ്യമന്ത്രി?' എന്ന ചോദ്യമാണ് കേരള രാഷ്ട്രീയത്തിലെ പ്രധാന ചര്ച്ചയായിരുന്നത്. 11 ദിവസത്തെ അനിശ്ചിതത്വത്തിനൊടുവില് ചര്ച്ചകള്ക്ക് വിരാമമിട്ട് ഹൈക്കമാന്ഡ് സതീശന്റെ പേരില് മുദ്രവെച്ചിരിക്കുകയാണ്. കെ സി വേണുഗോപാല്, രമേശ് ചെന്നിത്തല എന്നിവരുടെ പേരുകളും അവസാനഘട്ട ചര്ച്ചകളില് സജീവമായിരുന്നെങ്കിലും തെരഞ്ഞെടുപ്പില് യുഡിഎഫിന്റെ മുഖമായി മുന്നില് നിന്നതും എല്ഡിഎഫിനെതിരെ ശക്തമായ പ്രചാരണം നയിച്ചതുമാണ് സതീശന് അനുകൂലമായ പ്രധാന ഘടകങ്ങളായി വിലയിരുത്തപ്പെടുന്നത്. മുസ്ലീം ലീഗ് സര്വ്വ പിന്തുണയുമായി ഒപ്പം നിന്നതും സതീശന് തുണയായി. മുഖ്യമന്ത്രി പ്രഖ്യാപനത്തിന് പിന്നാലെ തലസ്ഥാനത്ത് അടക്കമുള്ള വിവിധ ഭാഗങ്ങളില് കോണ്ഗ്രസ് പ്രവര്ത്തകര് ആഘോഷം ആരംഭിച്ചു. അതേസമയം, മന്ത്രിസഭാ രൂപീകരണ ചര്ച്ചകള് ഉടന് ആരംഭിക്കുമെന്നാണ് വിവരം. മുസ്ലിം ലീഗിന് നിര്ണായക വകുപ്പുകള് ലഭിക്കുമെന്നാണ് സൂചന.
