കേരളത്തില്‍ ഇന്നും സ്വര്‍ണവില താഴോട്ട്
കേരളത്തില്‍ സ്വര്‍ണവില താഴോട്ട്. ഈ മാസത്തെ ഏറ്റവും കുറഞ്ഞ നിരക്കിലേക്ക് സ്വര്‍ണം ഇന്നെത്തി. പവന് 200 രൂപയും ഗ്രാമിന് 25 രൂപയുമാണ് ഇന്ന് കുറഞ്ഞത്. ഇതോടെ ബുധനാഴ്ച്ച സ്വര്‍ണവില പവന് 32,880 രൂപയും ഗ്രാമിന് 4,110 രൂപയുമായി. ഈ മാസം സ്വര്‍ണം രേഖപ്പെടുത്തിയ ഏറ്റവും ഉയര്‍ന്ന വിലനിലവാരം പവന് 34,440 രൂപയാണ് (മാര്ച്ച് ഒന്നിന്). മാര്ച്ച് മാസം ഇതുവരെ പവന് 1,560 രൂപയുടെ വിലയിടിവ് രേഖപ്പെടുത്തിയത് . ഫെബ്രുവരിയില്‍ സ്വര്‍ണം പവന് 2,640 രൂപ കുറഞ്ഞിരുന്നു. കഴിഞ്ഞമാസം സ്വര്‍ണം കുറിച്ച ഏറ്റവും ഉയര്‍ന്ന നിരക്ക് 36,800 രൂപയും ഏറ്റവും കുറഞ്ഞ നിരക്ക് 34,160 രൂപയുമായിരുന്നു (പവന്). വെള്ളി നിരക്കിലും ഇന്ന് ചെറിയ മാറ്റം സംഭവിച്ചു. 1 ഗ്രാം വെള്ളിക്ക് 63.10 രൂപയാണ് ബുധനാഴ്ച്ച വില. 8 ഗ്രാം വെള്ളിക്ക് വില 504.80 രൂപ. ദേശിയ വിപണിയിൽ കഴിഞ്ഞ ഒരു വര്‍ഷത്തിനിടെയുള്ള ഏറ്റവും താഴ്ന്ന നിരക്കിലാണ് സ്വര്‍ണത്തിന്റെ ഇപ്പോഴത്തെ വ്യാപാരം നടക്കുന്നത് .
മറ്റു വിലയേറിയ ലോഹങ്ങളില്‍ വെള്ളിയുടെ നില ഭദ്രമാണ്. ഔണ്‍സിന് 24.01 ഡോളര്‍ എന്ന നിരക്കില്‍ വെള്ളി വ്യാപാരം പുരോഗമിക്കുന്നു. പ്ലാറ്റിനത്തിന്റെ ഔണ്‍സ് നിരക്ക് 0.5 ശതമാനം വര്‍ധിച്ച് 1,160.05 ഡോളറിലെത്തി. പലേഡിയത്തിന്റെ ഔണ്‍സ് നിരക്ക് 0.7 ശതമാനം കൂടി 2,607.04 ഡോളറും രേഖപ്പെടുത്തുന്നു. ആഗോള വിപണിയിൽ ഇന്ന് സ്വര്‍ണത്തിന്റെ ഔണ്‍സ് നിരക്ക് 0.1 ശതമാനം കുറഞ്ഞ് 1,683.56 ഡോളറില്‍ എത്തി.
