കോവിഡ് നിയന്ത്രണങ്ങളില്‍ കൂടുതല്‍ ഇളവുകള്‍ പ്രഖ്യാപിച്ച് യുഎഇ
ദുബായ്: കോവിഡ് നിയന്ത്രണങ്ങളില്‍ കൂടുതല്‍ ഇളവുകള്‍ പ്രഖ്യാപിച്ച് യുഎഇ. ഷോപ്പിങ് കേന്ദ്രങ്ങള്‍, റസ്റ്ററന്റുകള്‍, കഫ്റ്റീരിയകള്‍, സിനിമ തിയറ്ററുകള്‍, ഉല്ലാസ കേന്ദ്രങ്ങള്‍, മ്യൂസിയം എന്നിവിടങ്ങളില്‍ 80% പേര്‍ക്ക് പ്രവേശനം അനുവദിക്കും.
ഒരു മേശയ്ക്കു ചുറ്റും ഇരിക്കാവുന്നവരുടെ എണ്ണം 10 ആയി ഉയര്‍ത്തിയതായും ദേശീയ ദുരന്ത നിവാരണ സമിതി അറിയിച്ചു. അതേസമയം പൊതുപരിപാടികളില്‍ പ്രവേശനം 60% പേര്‍ക്കു മാത്രമായിരിക്കും. വിവാഹ വിരുന്നുകള്‍ക്കടക്കം ഇത് ബാധകമാണ്. പങ്കെടുക്കുന്നവരുടെ എണ്ണം 300ല്‍ കൂടുകയുമരുത്. പങ്കെടുക്കുന്നവര്‍ 2 ഡോസ് വാക്‌സീന്‍ സ്വീകരിക്കുകയും പരിപാടിയുടെ 48 മണിക്കൂറിനകം നടത്തിയ ആര്‍ടിപിസിആര്‍ പരിശോധനയുടെ നെഗറ്റീവ് റിപ്പോര്‍ട്ട് ഹാജരാക്കുകയും വേണം.
രണ്ടാമത്തെ ഡോസ് 6 മാസത്തില്‍ കൂടുതല്‍ വൈകരുത്. വയോധികരാണെങ്കില്‍ 3 മാസത്തില്‍ കൂടുതല്‍ വൈകരുതെന്നാണു വ്യവസ്ഥ പൊതുവാഹനങ്ങള്‍ക്കു 75% ശേഷിയില്‍ സര്‍വീസ് നടത്താം. പുറത്തിറങ്ങുമ്പോഴും പൊതുവാഹനങ്ങളില്‍ യാത്ര ചെയ്യുമ്പോഴും മാസ്ക് ധരിക്കുകയും അകലം പാലിക്കുകയും വേണം.
