വാഹന ഡീലര്‍മാര്‍ക്ക് ഇനി ഇന്‍ഷുറന്‍സ് പോളിസികളും വില്‍ക്കാം
കൊച്ചി: രാജ്യത്തെ വാഹന ഡീലര്‍മാര്‍ക്ക് വാഹന ഇന്‍ഷുറന്‍സ് ഇടനിലക്കാരായി പ്രവര്‍ത്തിക്കാനുള്ള അവസരമൊരുക്കി ഇന്‍ഷുറന്‍സ് റെഗുലേറ്ററി ആന്‍ഡ് ഡെവലപ്പ്മെന്റ് അതോറിറ്റി (ഐആര്‍ഡിഎഐ). വാഹന ഇന്‍ഷുറന്‍സ് സേവന ദാതാക്കള്‍ക്കുള്ള മാര്‍ഗ്ഗനിര്‍ദ്ദേശങ്ങള്‍ അവലോകനം ചെയ്യുന്നതിനായി ഐആര്‍ഡിഎഐ രൂപീകരിച്ച കമ്മിറ്റിയാണ് ഇതുസംബന്ധിച്ച നിര്‍ദ്ദേശം മുന്നോട്ട് വച്ചത്. വാഹന ഇന്‍ഷുറന്‍സ് ബിസിനസുമായി ബന്ധപ്പെട്ട വിതരണ ചാനലുകളിലൊന്നായി വാഹന ഡീലര്‍മാരെ പരിഗണിക്കാമെന്ന് കമ്മിറ്റി അഭിപ്രായപ്പെട്ടു.
വാഹന ഇന്‍ഷുറന്‍സ് ബ്രോക്കര്‍മാര്‍ എന്ന നിലയിലാണ് ഡീലര്‍മാര്‍ അറിയപ്പെടുക. ഇവര്‍ക്ക് ബ്രോക്കറുടെ സബ്ബ്രോക്കറോ കോര്‍പ്പറേറ്റ് ഏജന്റിന്റെ സബ് ഏജന്റോ ആയി പ്രവര്‍ത്തിക്കാം. ഇന്‍ഷുറന്‍സിന്റെ പ്രത്യേക വിതരണ ചാനലോ സബ് ബ്രോക്കറോ ആകാനുള്ള ഓപ്ഷന്‍ വാഹന ഡീലര്‍മാര്‍ക്ക് തിരഞ്ഞെടുക്കാം. വിതരണ ചാനലാകാന്‍ തീരുമാനിക്കുകയാണെങ്കില്‍ ഇന്‍ഷുറന്‍സ് കമ്പനികളുമായി നിര്‍ബന്ധമായും കരാറുകളില്‍ ഒപ്പിട്ടിരിക്കണം. ഡീലര്‍മാര്‍ക്ക് വാഹന ഇന്‍ഷുറന്‍സ് പോളിസികള്‍ മാത്രമേ വില്‍ക്കാന്‍ കഴിയുകയുള്ളൂ. പ്രീമിയം ശേഖരിക്കാന്‍ കഴിയില്ല.
വാഹനം ഇന്‍ഷുര്‍ ചെയ്യുന്ന കമ്പനിക്ക് ഓണ്‍ലൈന്‍ പേയ്മെന്റ് നല്‍കുന്നതിന് ഡീലര്‍മാര്‍ ഉപയോക്താക്കള്‍ക്ക് ആക്സസ് നല്‍കണം. ഇടനിലക്കാരനോ ഒന്നോ അതിലധികമോ ഇന്‍ഷുറന്‍സ് കമ്പനികള്‍ക്കോ ഒരേ സമയം ഒരു സേവന ദാതാവിനെ സ്പോണ്‍സര്‍ ചെയ്യാന്‍ കഴിയും. ഇന്‍ഷുറന്‍സ് ഇടനിലക്കാരുടെ പാനലില്‍ ഇല്ലാത്ത ഇന്‍ഷുറന്‍സ് കമ്പനികളുടെ ഉപഭോക്താക്കള്‍ക്ക് വാഹന ഇന്‍ഷുറന്‍സ് പോളിസികള്‍ വാഗ്ദാനം ചെയ്യാനുള്ള അവസരവും ഡീലര്‍മാര്‍ക്ക് നല്‍കും.
