കൊച്ചി: ഭൂട്ടാന് വാഹനക്കടത്തുമായി ബന്ധപ്പെട്ട് സിനിമാ താരങ്ങളെ ചോദ്യം ചെയ്യാന് ഇഡി. പിടിച്ചെടുത്ത രേഖകള് പരിശോധിച്ച ശേഷം ഹാജരാകാന് ആവശ്യപ്പെടും. പൃഥ്വിരാജ്, ദുല്ഖര് സല്മാന്, അമിത് ചക്കാലക്കല് എന്നിവര്ക്ക് നോട്ടീസ് നല്കാനാണ് ഇഡിയുടെ തീരുമാനം. താരങ്ങളോട് ബാങ്ക് അക്കൗണ്ട് വിവരങ്ങള് ഹാജരാക്കാന് ഇഡി നിര്ദേശം നല്കിയിട്ടുണ്ട്. ഫെമ ചട്ട ലംഘനവുമായി ബന്ധപ്പെട്ട് തെളിവുകള് ശേഖരിക്കുകയാണ് ലക്ഷ്യം. ഇന്നലെ നടന്ന പരിശോധനയില് ദുല്ഖര് സല്മാന് ഉള്പ്പെടെയുള്ള ആര് സി ഉടമകളുടെ മൊഴിയും രേഖപ്പെടുത്തിയിട്ടുണ്ട്. ദുല്ഖറിന്റെ വാഹനം വിട്ടു നല്കുന്നില്ല എങ്കില് അതിനു കൃത്യമായ വിശദീകരണം നല്കാന് കസ്റ്റംസിനോട് കഴിഞ്ഞ ദിവസം ഹൈക്കോടതി ആവശ്യപ്പെട്ടിരുന്നു.
ദുല്ഖര് സല്മാന്, പൃഥ്വിരാജ്, അമിത് ചക്കാലക്കല് എന്നിവരുടെ വീടുകളിലാണ് ഇഡി റെയ്ഡ് നടന്നത്. മമ്മൂട്ടി ഹൌസ്, മമ്മൂട്ടിയും ദുല്ഖറും താമസിക്കുന്ന ഇളംകുളത്തെ പുതിയ വീട്, ദുല്ഖറിന്റെ ചെന്നൈയിലെ വീട്, പൃഥ്വിരാജിന്റെ വീട്, അമിത് ചക്കാലക്കലിന്റെ കടവന്ത്രയിലെ വീട് തുടങ്ങി 17 സ്ഥലങ്ങളിലാണ് ഒരേസമയം പരിശോധന നടന്നത്. അഞ്ച് ജില്ലകളിലായി വാഹന ഡീലര്മാരുടെ വീടുകളിലും പരിശോധന നടക്കുന്നുണ്ട്.
ഇന്ത്യയിലേക്ക് ഭൂട്ടാന്/നേപ്പാള് റൂട്ടുകളിലൂടെ ലാന്ഡ് ക്രൂയിസര്, ഡിഫന്ഡര് തുടങ്ങിയ ആഡംബര കാറുകളുടെ നിയമവിരുദ്ധ ഇറക്കുമതിയിലും രജിസ്ട്രേഷനിലും ഏര്പ്പെട്ടിരിക്കുന്ന ഒരു സിന്ഡിക്കേറ്റിനെ കുറിച്ചുള്ള വിവരങ്ങളുടെ അടിസ്ഥാനത്തിലാണ് റെയ്ഡ് എന്നാണ് ഇഡി അറിയിച്ചത്. കോയമ്പത്തൂര് ആസ്ഥാനമായുള്ള ശൃംഖല വ്യാജ രേഖകളും (ഇന്ത്യന് ആര്മി, യുഎസ് എംബസി, എംഇഎ എന്നിവയില് നിന്നുള്ളതാണെന്ന് കരുതപ്പെടുന്നു) ഉപയോഗിച്ചും അരുണാചല് പ്രദേശ്, ഹിമാചല് പ്രദേശ്, മറ്റ് സംസ്ഥാനങ്ങള് എന്നിവിടങ്ങളിലെ വ്യാജ ആര്ടിഒ രജിസ്ട്രേഷനുകളും ഉപയോഗിച്ചതായി പ്രാഥമികമായി കണ്ടെത്തി. പിന്നീട് വാഹനങ്ങള് സിനിമാ താരങ്ങള് ഉള്പ്പെടെയുള്ളവര്ക്ക് കുറഞ്ഞ വിലയ്ക്ക് വിറ്റു. ഫെമയുടെ 3, 4, 8 വകുപ്പുകളുടെ ലംഘനം പ്രഥമദൃഷ്ട്യാ കണ്ടെത്തിയതിനെ തുടര്ന്ന് ഇഡി നടപടി ആരംഭിച്ചു.
അനധികൃത വിദേശനാണ്യ ഇടപാടുകളും ഹവാല വഴിയുള്ള അതിര്ത്തി കടന്നുള്ള പണമടയ്ക്കലും ഇതില് ഉള്പ്പെടുന്നു. എറണാകുളം, തൃശൂര്, കോഴിക്കോട്, മലപ്പുറം, കോട്ടയം, കോയമ്പത്തൂര് എന്നിവിടങ്ങളിലാണ് പരിശോധന. സിനിമാ താരങ്ങളായ പൃഥ്വിരാജ്, ദുല്ഖര് സല്മാന്, അമിത് ചക്കാലക്കല് എന്നിവരുടെ വസതികളും സ്ഥാപനങ്ങളും, ചില വാഹന ഉടമകള്, ഓട്ടോ വര്ക്ക് ഷോപ്പുകള്, വ്യാപാരികള് എന്നിവയുള്പ്പെടെ 17 സ്ഥലങ്ങളിലാണ് പരിശോധനയെന്നും ഇഡി അറിയിച്ചു.
