കോട്ടയം: നടന് കൃഷ്ണകുമാറിന്റെ വാഹനത്തില്‍ മുഖ്യമന്ത്രിക്ക് അകമ്പടി പോയ പൊലീസ് വാഹനം മനപൂര്‍വം ഇടിപ്പിച്ചതായി പരാതി. വാഹനത്തില്‍ ഉണ്ടായിരുന്ന പൊലീസ് സേനാംഗങ്ങള്‍ മോശമായി പെരുമാറിയെന്നും നടന് പന്തളം പൊലീസില്‍ നല്കിയ പരാതിയില്‍ പറയുന്നു.മുഖ്യമന്ത്രി രാവിലെ എം സി റോഡിലൂടെ പുതുപ്പള്ളിക്ക് പോയിരുന്നു. ഇതിനിടയിലാണ് സംഭവമെന്നാണ് പരാതി. ബിജെപി ദേശീയ നിര്‍വാഹക സമിതി അംഗം കൂടിയാണ് കൃഷ്ണ കുമാര്‍.
പുതുപ്പള്ളിയിലേക്ക് തെരഞ്ഞെടുപ്പ് പ്രചാരണത്തിനായി പോകുകയായിരുന്നു. പന്തളം എത്തുന്നതിന് മുമ്പ് 20 മിനിറ്റ് മുമ്പാണ് സംഭവം. പൊലീസ് ബസ് ഹോണടിക്കുന്നുണ്ടായിരുന്നു. പക്ഷേ കാര്‍ ഒതുക്കാന്‍ സ്ഥലമില്ലായിരുന്നു. കുറച്ച് മുന്നോട്ട് പോയി കാര്‍ ഒതുക്കാമെന്ന് കരുതിയപ്പോള്‍ പൊലീസ് ബസ് കാറില്‍ ഇടിപ്പിക്കുകയായിരുന്നുവെന്ന് കൃഷ്ണകുമാര്‍ പറഞ്ഞു.
ബി.ജെ.പിയുടെ കൊടി കാറില്‍ ഇരിക്കുന്നത് കണ്ടിട്ടുള്ള അസഹിഷ്ണുതയാണ് പൊലീസുകാര്‍ക്കെന്നും കൃഷ്ണകുമാര്‍ പറഞ്ഞു. 'അവര്‍ ചീത്തവിളിക്കുമ്പോള്‍ തിരിച്ച് ചീത്തവിളിക്കാന്‍ അറിയാഞ്ഞിട്ടില്ല. പക്ഷേ എന്റെ അച്ഛന്‍ പൊലീസുകാരനായിരുന്നു. യൂണിഫോമില്‍ നില്‍ക്കുന്നവരോട് അപമര്യാദയായി പെരുമാറരുതെന്നാണ് അച്ഛന്‍ പഠിപ്പിച്ചത്.മൊത്തം സേനക്ക് ചീത്തപ്പേരുണ്ടാക്കുന്ന പൊലീസ് ഗുണ്ടകളാണ് ഇവര്‍. രാഷ്ട്രീയത്തെ രാഷ്ട്രീയമായി എതിര്‍ക്കാം. ഇത്തരം ഗുണ്ടാ പ്രവര്‍ത്തനങ്ങളും അപായപ്പെടുത്താന്‍ ശ്രമിക്കുന്ന പരിപാടികളും ഒരിക്കലും നില നില്‍ക്കില്ല'. എല്ലാവരെയും ഇടിച്ചു തെറിപ്പിച്ചു പോകാനാണ് ശ്രമമെങ്കില്‍ മുഖ്യമന്ത്രി ഹെലികോപ്ടറില്‍ പോകുന്നതാണ് നല്ലതെന്നും എന്നാല്‍ മനുഷ്യന് തലവേദനയില്ലല്ലോയെന്നും കൃഷ്ണ കുമാര്‍ പ്രതികരിച്ചു.
