ഷഓമിയുടെ ആദ്യ ഗെയിമിങ് ഫോണ്‍, പോക്കോ F3 ജിടിയായി ഇന്ത്യയിലേക്ക്
ടെക് ലോകത്തെ ചൈനീസ് ഭീമനായ ഷഓമി കഴിഞ്ഞ ദിവസമാണ് ഗെയിമിങ് ആരാധകര്‍ക്കുള്ള തങ്ങളുടെ ആദ്യ ഫോണ്‍, റെഡ്മി K40 ഗെയിമിംഗ് എഡിഷന്‍ ചൈനീസ് വിപണിയില്‍ അവതരിപ്പിച്ചത്. റിപോര്‍ട്ടുകള്‍ അനുസരിച്ച് ഗെയിമിങ് ആരാധകര്‍ക്കുള്ള ഈ ഫോണ്‍ അധികം താമസമില്ലാതെ ഇന്ത്യയിലുമെത്തും. പക്ഷെ റെഡ്മി K40 ഗെയിമിംഗ് എഡിഷന്‍ ആയല്ല റീബ്രാന്‍ഡ് ചെയ്തത് പോക്കോ F3 ജിടിയായാവും ഇന്ത്യയില്‍ അവതരിപ്പിക്കുക എന്നാണ് റിപോര്‍ട്ടുകള്‍.
ടിപ്പ്സ്റ്റര്‍ കാസ്‌പെര്‍ സ്‌കര്‍സയ്പെക് ആണ് ഇത് സംബന്ധിച്ച സൂചനകള്‍ നല്‍കുന്നത്. മോഡല്‍ നമ്പര്‍ M2104K10I ആണ് പോക്കോ F3 ജിടിയായി അണിയറയില്‍ തയ്യാറാവുന്നത്. ഇതേ മോഡല്‍ നമ്പര്‍ ആണ് പ്രാഥമിക നിര്‍മ്മാണഘട്ടത്തില്‍ റെഡ്മി K40 ഗെയിമിംഗ് എഡിഷനും എന്ന് ടിപ്പ്സ്റ്റര്‍ വ്യക്തമാക്കുന്നു. അതെ സമയം പോക്കോ F3 ജിടിയുടെയോ, റെഡ്മി K40 ഗെയിമിംഗ് എഡിഷന്റെയോ ഇന്ത്യന്‍ ലോഞ്ചിനെപ്പറ്റി ഷഓമി ഇന്ത്യ യാതൊരു സ്ഥിരീകരണവും നല്‍കിയിട്ടില്ല.
പ്രധാനമായും ഗെയ്മിങ്ങിനായി സ്മാര്‍ട്ട്‌ഫോണിനെ ആശ്രയിക്കുന്നവര്‍ക്ക് യോജിക്കുന്ന വിധം ചുരുക്കി വയ്ക്കാവുന്ന ഷോള്‍ഡര്‍ ബട്ടണുകള്‍, മൂന്നു മൈക്കുകള്‍, ഡോള്‍ബി അറ്റ്‌മോസ് സപ്പോര്‍ട്ട്, ജെബിഎല്‍ കമ്പനി ട്യൂണ്‍ ചെയ്ത ഓഡിയോ എന്നിവയാണ് റെഡ്മി K40 ഗെയിമിംഗ് എഡിഷന്റെ പ്രത്യേകതകള്‍. റീബ്രാന്‍ഡഡ് പതിപ്പായതുകൊണ്ട് ഈ ഫീച്ചറുകളെല്ലാം പോക്കോ F3 ജിടിയിലും ഇടം പിടിക്കും.
റെഡ്മി K40 ഗെയിമിംഗ് എഡിഷന്റെ അതെ സ്‌പെസിഫിക്കേഷന്‍ പോക്കോ F3 ജിടിയിലും പ്രതീക്ഷിക്കാം. അങ്ങനെയെങ്കില്‍ ആന്‍ഡ്രോയിഡ് 11 അടിസ്ഥാനമായ MIUI 12.5 ഓപ്പറേറ്റിംഗ് സിസ്റ്റത്തില്‍ ആണ് പോക്കോ F3 ജിടി പ്രവര്‍ത്തിക്കുക. 120 ഹെര്‍ട്‌സ് റിഫ്രഷ് റേറ്റും, എച്ച്ഡിആര്‍ 10+ സപ്പോര്‍ട്ടുമുള്ള 6.67 ഇഞ്ച് ഫുള്‍ എച്ച്ഡി + (1,080x2,400 പിക്സല്‍) ഒഎല്‍ഇഡി ഡിസ്പ്ലേയായിരിക്കും ഹാന്ഡ്സെറ്റിന്. 12 ജിബി വരെ എല്‍പിഡിഡിആര്‍ 4 എക്‌സ് റാമും, 256 ജിബി വരെ യുഎഫ്എസ് 3.1 സ്റ്റോറേജും, മീഡിയടെക് ഡൈമെന്‍സിറ്റി 1200 SoC പ്രോസസ്സറും പോക്കോ F3 ജിടിയില്‍ പ്രതീക്ഷിക്കാം. ഗെയിമിങ് സമയത്ത് ഫോണ്‍ ചൂടാവാതിരിക്കാന്‍ വേപ്പര്‍ ചേംബര്‍ ലിക്വിഡ്കൂള്‍ സാങ്കേതികവിദ്യ പോക്കോ F3 ജിടിയില്‍ ഇടം പിടിക്കും.
എഫ് / 1.65 ലെന്‍സുള്ള 64 മെഗാപിക്സല് പ്രൈമറി സെന്‍സര്‍, അള്‍ട്രാ വൈഡ് ആംഗിള്‍ ലെന്‍സുള്ള 8 മെഗാപിക്സല് സെന്‍സര്‍, 2 മെഗാപിക്സല് സെന്‍സര്‍ എന്നിവ ഉള്‍പ്പെടുന്ന ട്രിപ്പിള്‍ റിയര്‍ ക്യാമറയായിരിക്കും ഹാന്ഡ്സെറ്റിന്. 16 മെഗാപിക്സല് സെല്‍ഫി ക്യാമെറായാണ് മുന്‍വശത്ത്. 67W ഫാസ്റ്റ് ചാര്‍ജിങ് സപ്പോര്‍ട്ടുള്ള 5,065mAh ബാറ്ററിയാണ് പോക്കോ F3 ജിടിയില്‍ ഇടം പിടിക്കുക.
