അമേരിക്കന്‍ ബിഗ് ടെക് കമ്പനിയിലെ ഇന്ത്യന്‍
വംശജരായ സിഇഒമാര്‍;ഗൂഗിള്‍ മുതല്‍ ഐബിഎം വരെ
ടെക്ക് ലോകം ഭരിക്കാന്‍ ഒരു ഇന്ത്യക്കാരന്‍ കൂടി. ട്വിറ്റര്‍ തലപ്പത്തേക്ക് പരാഗ് അഗര്‍വാള്‍ നിയമിതനായതോടെ ചൂട് പിടിച്ച ചര്‍ച്ചയിലാണ് സോഷ്യല്‍ മീഡിയ. മറ്റൊരു ഇന്ത്യന്‍ വംശജന്‍ കൂടി ഐടി ഭീമന്‍ കമ്പനിയുടെ തലപ്പത്തേക്ക് എത്തിയിരിക്കുകയാണ്. പരാഗ് അഗര്‍വാളിനെ കൂടാതെ നിരവധി ഇന്ത്യന്‍ തലച്ചോറുകള്‍ ബഹുരാഷ്ട്ര കുത്തക കമ്പനികളുടെ തലപ്പത്ത് ഇരിക്കുന്നവരില്‍ ഉണ്ട്. ഗൂഗിളിന്റെ സുന്ദര്‍ പിച്ചൈ, മൈക്രോസോഫ്റ്റിന്റെ സത്യ നദെല്ല, അഡോബിന്റെ ശാന്തനു നാരായന്‍, ഐബിഎമ്മിന്റെ അരവിന്ദ് കൃഷ്ണ തുടങ്ങിയവരുടെ പട്ടിക നീളുകയാണ്. പരിശോധിക്കാം അമേരിക്കന്‍ ആഗോള കമ്പനികളുടെ തലപ്പത്ത് ഇരിക്കുന്ന ഇന്ത്യന്‍ വംശജരെ....
സുന്ദര്‍ പിച്ചൈ-ആല്‍ഫബെറ്റ് (ഗൂഗിള്‍)
ഇന്ത്യ ഏറ്റവും കൂടുതല്‍ ആഘോഷിച്ച പേരാണ് സുന്ദര്‍ പിച്ചൈ. 2014 നാണ് ഗൂഗിളിന്റെ തലവനായി സുന്ദര്‍ പിച്ചൈ എത്തുന്നത്. തമിഴ്നാട്ടിലെ മധുരയിലായിരുന്നു സുന്ദര്‍ പിച്ചൈയുടെ ജനനം. ഖരഗ്പുര്‍ഐ.ഐ.ടി.യില്‍നിന്ന് വെള്ളിമെഡലോടെ ബി.ടെക് സ്വന്തമാക്കി. പിന്നീട് യു.എസിലെ സ്റ്റാന്‍ഫഡ് സര്‍വകലാശാലയില്‍നിന്ന് മെറ്റീരിയല്‍ എന്‍ജിനിയറിങ്ങില്‍ ബിരുദാനന്തര ബിരുദവും പെന്‍സില്‍വേനിയ സര്‍വകലാശാലയില്‍നിന്ന് എം.ബി.എയും നേടി. 2004 ല്‍ ഗൂഗിളില്‍ പ്രവേശിച്ച സുന്ദര്‍ പിച്ചൈ 2014 സിഇഒ ആയി നിയമിതനായി.
സത്യ നദെല്ല-മൈക്രോസോഫ്റ്റ്
സുന്ദര്‍ പിച്ചൈ ഗൂഗിള്‍ സിഇഒ ആകുന്നതിനു മുമ്പ് തന്നെ മൈക്രോസോഫ്റ്റിന്റെ സിഇഒ ആയി നിയമിതനായ ഇന്ത്യക്കാരനാണ് സത്യ നദെല്ല. അതിനു മുമ്പ് മൈക്രോസോഫ്റ്റിന്റെ തന്നെ ക്ലൗഡ് ആന്‍ഡ് എന്റര്‍പ്രൈസ് ഗ്രൂപ്പിന്റെ എക്‌സിക്യൂട്ടീവ് വൈസ് പ്രസിഡന്റായിരുന്നു അദ്ദേഹം. ലോകത്തിലെ ഏറ്റവും വലിയ ക്ലൗഡ് ഇന്‍ഫ്രാസ്ട്രക്ചറുകളുടെ വികസനത്തിന് മേല്‍നോട്ടം വഹിക്കുന്ന ക്ലൗഡ് കമ്പ്യൂട്ടിംഗിലേക്കുള്ള കമ്പനിയുടെ അതിവേഗ വളര്‍ച്ചയ്ക്ക് നദെല്ല വഹിച്ച പങ്ക് വളരെ വലുതാണ്. ബില്‍ ഗേറ്റ്സിനും സ്റ്റീവിനും ശേഷം കമ്പനിയുടെ മൂന്നാമത്തെ സിഇഒ ആയാണ് നദെല്ല നിയോഗിക്കപ്പെട്ടത്.കര്‍ണാടകയിലെ മണിപ്പാല്‍ ഇന്‍സ്റ്റിറ്റ്യൂട്ട് ഓഫ് ടെക്‌നോളജിയില്‍ നിന്ന് ഇലക്ട്രിക്കല്‍ എഞ്ചിനീയറിംഗില്‍ ബിരുദം നേടിയ നദെല്ല, അമേരിക്കയിലെ വിസ്‌കോന്‍സിന്‍ സര്‍വകലാശാലയില്‍ നിന്ന് കമ്പ്യൂട്ടര്‍ സയന്‍സില്‍ എംഎസ് ബിരുദവും നേടി.
. അരവിന്ദ് കൃഷ്ണ-ഐബിഎം
ഐബിഎമ്മിന്റെ നിലവിലെ ചെയര്‍മാനും സിഇഒയുമാണ് അരവിന്ദ് കൃഷ്ണ. ആന്ധ്രാപ്രദേശിലാണ് അദ്ദേഹം ജനിച്ചത്. 2020 ഏപ്രില്‍ മുതല്‍ ഐബിഎമ്മിന്റെ സിഇഒ ആകുകയും 2021 ജനുവരിയില്‍ ചെയര്‍മാന്‍ ചുമതലകള്‍ ഏറ്റെടുക്കുകയും ചെയ്തു.ഐബിഎമ്മിന്റെ എക്കാലത്തെയും വലിയ (34 ബില്യണ്‍ ഡോളര്‍) റെഡ് ഹാറ്റ് നേട്ടത്തിന് പിന്നില്‍ അരവിന്ദ് കൃഷ്ണയായിരുന്നു പ്രവര്‍ത്തിച്ചിരുന്നത്.ഇലക്ട്രിക്കല്‍ എന്‍ജിനീയറിങ്ങില്‍ ഐഐടി കാണ്‍പൂരില്‍ നിന്ന് ബിരുദം കരസ്ഥമാക്കി. ശേഷം ഇല്ലിനോയ്സ് സര്‍വകലാശാലയില്‍നിന്ന് ഇലക്ട്രിക്കല്‍ എന്‍ജിനീയറിങ്ങില്‍ പിഎച്ച്ഡിയും സ്വന്തമാക്കി.
ശന്തനു നാരായണ്‍-അഡോബ്
ആന്ധ്രാപ്രദേശിലെ ഹൈദരാബാദിലാണ് ശന്തനു നാരായണ്‍ ജനിച്ചത്. 2007 ഡിസംബര്‍ മുതലാണ് അഡോബ് ഇന്‍കോര്‍പ്പറേഷന്റെ തലപ്പത്ത് അദ്ദേഹം എത്തുന്നത്. അഡോബ് ഇങ്കിന്റെ സിഇഒയും ആയി പ്രവര്‍ത്തിക്കുന്നതിന് മുമ്പ് അദ്ദേഹം കമ്പനിയുടെ പ്രസിഡന്റും സിഇഒ ചീഫ് ഓപ്പറേറ്റിങ് ഓഫീസറായും സേവനമനുഷ്ഠിച്ചിരുന്നു.ഹൈദരാബാദിലെ ഉസ്മാനിയ യൂണിവേഴ്‌സിറ്റിയിലെ എന്‍ജിനീയറിങ് കോളേജില്‍ നിന്ന് ഇലക്ട്രോണിക്സ് ആന്‍ഡ് കമ്മ്യൂണിക്കേഷനില്‍ നിന്ന് ബിരുദം നേടി. പിന്നീട് ഒഹിയോ ബൗളിംഗ് ഗ്രീന്‍ സ്റ്റേറ്റ് യൂണിവേഴ്‌സിറ്റിയില്‍ നിന്ന് കമ്പ്യൂട്ടര്‍ സയന്‍സില്‍ ബിരുദാനന്തര ബിരുദവും സ്വന്തമാക്കി. കാലിഫോര്‍ണിയ സര്‍വകലാശാലയിലെ ഹാസ് സ്‌കൂള്‍ ഓഫ് ബിസിനസില്‍ നിന്ന് എംബിഎ ബിരുദവും നാരായണ്‍ നേടിയിട്ടുണ്ട്.
രഘു രഘുറാം-വിഎം വെയര്‍
ക്ലൗഡ് കംപ്യൂട്ടിങ് കമ്പനിയായ വിഎംവെയറിന്റെ പുതിയ സിഇഒ ആണ് രഘു രഘുറാം. 2003 ലാണ് അദ്ദേഹം കമ്പനിയില്‍ എത്തുന്നത്. സിഇഒ ഉള്‍പ്പെടെ വിഎംവെയറില്‍ രഘുറാം ഒന്നിലധികം നേതൃത്വ റോളുകള്‍ വഹിച്ചിട്ടുണ്ട്. വിഎംവെയറില്‍ ജോലി ചെയ്യുന്നതിന് മുമ്പ് അദ്ദേഹം എഒഎല്‍, ബാംഗ് നെറ്റ്വര്‍ക്കുകള്‍, നെറ്റ്സ്‌കേപ്പ് എന്നിവയില്‍ ജോലി ചെയ്തിട്ടുണ്ട്. പ്രോഡക്റ്റ് മാനേജ്മെന്റും മാര്‍ക്കറ്റിംഗ് റോളുകളും വഹിച്ചിരുന്നു.
ഐഐടി ബോംബെയില്‍ നിന്ന് ഇലക്ട്രിക്കല്‍ എഞ്ചിനീയറിംഗില്‍ ബിരുദാനന്തര ബിരുദം നേടിയ രഘുറാം, വാര്‍ട്ടണ്‍ സ്‌കൂള്‍ ഓഫ് ബിസിനസില്‍ നിന്ന് എംബിഎ ബിരുദവും നേടിയിട്ടുണ്ട്.
