മുല്ലപ്പെരിയാര്‍ അണക്കെട്ടില്‍ ജലനിരപ്പ് 136 അടി ഉയര്‍ന്നു; ആശങ്കപ്പെടേണ്ട സാഹചര്യമില്ലെന്ന് അധികൃതര്‍
ഇടുക്കി: മുല്ലപ്പെരിയാര്‍ അണക്കെട്ടില്‍ ജലനിരപ്പ് 136 അടി ഉയര്‍ന്നു.136.10 അടിയാണ് ഇപ്പോഴത്തെ ജലനിരപ്പ് .142 അടിയാണ് സുപ്രീം കോടതി നിര്‍ദ്ദേശിച്ചിരിക്കുന്ന ജലനിരപ്പ്. മഴ കുറഞ്ഞതിനാലും തമിഴ്നാട് കൂടുതല്‍ വെള്ളം കൊണ്ടു പോയി തുടങ്ങിയതിനാലും ആശങ്കപ്പെടേണ്ട സഹചര്യം ഇല്ലെന്ന് ജില്ലാ ഭരണകൂടം അറിയിച്ചു.
കൂടുതല്‍ വെള്ളം എടുക്കണമെന്നാവശ്യപ്പെട്ട് ജലവിഭവ വകുപ്പ് മന്ത്രി റോഷി അഗസ്റ്റിന്‍ തമിഴ്നാട് മുഖ്യമന്ത്രിക്ക് കത്തയച്ചിരുന്നു. സെക്കന്റില്‍ 1867 ഘനയടി വെള്ളം ഇപ്പോള്‍ ഡാമില്‍ നിന്ന് തമിഴ്നാട് കൊണ്ടുപോകുന്നുണ്ട്. 3631 ഘനയടി വെള്ളം ഡാമിലേക്ക് ഒഴുകിയെത്തുന്നുണ്ട്. പെരിയാര്‍ തീരത്തെ വില്ലേജ് ഓഫീസുകളില്‍ കണ്ട്രോള് റൂമുകള്‍ തുറന്നു.
സ്പില്‍വേ ഷട്ടറുകള്‍ ഉയര്‍ത്തേണ്ടി വന്നാല്‍ പെരിയാറിന്റെ ഇരുകരകളിലുമുള്ളവരെ മാറ്റിപ്പാര്‍പ്പിക്കാന്‍ ക്യാമ്പുകള്‍ കണ്ടെത്തിയിട്ടുണ്ട്. ജലനിരപ്പ് 138 അടിയില്‍ കൂടിയാല്‍ മാത്രമേ ജനങ്ങളോ മാറ്റിപ്പാര്‍പ്പിക്കാനുള്ള നടപടികള്‍ തുടങ്ങുകയുള്ളൂ. ഇടുക്കി അണക്കെട്ടിലെ ജലനിരപ്പ് 2370.18 അടിയായി ഉയര്‍ന്നു.
