പരിഹാരമുണ്ടാക്കാമെന്ന് മുഖ്യമന്ത്രി; കട തുറക്കാനുള്ള നീക്കത്തില്‍ നിന്ന് വ്യാപാരികള്‍ പിന്മാറി
കോഴിക്കോട്: നാളെ മുതല്‍ കടകള്‍ തുറക്കാനുള്ള തീരുമാനത്തില്‍ നിന്ന് വ്യാപാരികള്‍ പിന്മാറി. മുഖ്യമന്ത്രി നേരിട്ട് ഫോണില്‍ വിളിച്ച് പ്രശ്നങ്ങള് പരിഹരിക്കാമെന്ന് ഉറപ്പ് നല്‍കിയതിന്റെ അടിസ്ഥാനത്തിലാണ് പിന്‍മാറ്റമെന്ന് വ്യാപാരി വ്യവസായി ഏകോപന സമിതി പ്രസിഡന്റ് ടി നസറുദ്ദീന്‍ പറഞ്ഞു.
വ്യാപരികള്‍ ഉന്നയിക്കുന്ന പ്രശ്നങ്ങള് ഗൗരവമുള്ളതാണെന്നും വരും ദിവസങ്ങളില്‍ ഇതിന് പരിഹാരം കാണാമെന്നും മുഖ്യമന്ത്രി ഉറപ്പു നല്കി. സമരപരിപാടികളില്‍ നിന്ന് പിന്‍തിരിയണമെന്നും കോവിഡ് വ്യാപനത്തിന് കാരണമാകുന്ന ഒരു നടപടിയും ്‌വ്യാപാരികളുടെ ഭാഗത്ത് നിന്ന് ഉണ്ടാകരുതെന്നും മുഖ്യമന്ത്രി നിര്‍ദേശിച്ചതായും വ്യാപാരി വ്യവസായി ഏകോപന സമിതി നേതാക്കള്‍ പറഞ്ഞു.
ഉച്ചയ്ക്ക് ജില്ലാ കലക്ടര്‍ നേതാക്കളുമായി ചര്‍ച്ച നടത്തിയിരുന്നെങ്കിലും സമരത്തില്‍ നിന്ന് പിന്‍മാറില്ലെന്ന നിലപാടിലായിരുന്നു വ്യാപാരികള്‍. തുടര്‍ന്ന് വിഷയത്തില്‍ മുഖ്യമന്ത്രി നേരിട്ട് ഇടപെട്ടതോടെ വ്യാപാരികള്‍ സമരത്തില്‍ നിന്ന് പിന്മാറുകയായിരുന്നു.
