യുപിയില്‍ കോളജ് വിദ്യാര്‍ത്ഥിക്ക് നേരെ പുള്ളിപ്പുലി ആക്രമണം
ഉത്തര്‍പ്രദേശില്‍ കോളജ് വിദ്യാര്‍ത്ഥിക്ക് നേരെ പുള്ളിപ്പുലി ആക്രമണം. അലിഗഡിലെ ചൗധരി നിഹാല്‍ സിംഗ് ഇന്റര്‍ കോളജിലാണ് സംഭവം. രാവിലെ കോളജില്‍ എത്തിയ വിദ്യാര്‍ത്ഥിക്ക് നേരെ ക്ലാസ് മുറിയില്‍ ഉണ്ടായിരുന്ന പുലി ആക്രമിക്കുയായിരുന്നു. പരുക്കേറ്റ വിദ്യാര്‍ത്ഥി ചികിത്സയിലാണ്.
രാവിലെ കോളജില്‍ എത്തി ക്ലാസ് മുറിയില്‍ കടന്നപ്പോളാണ് വിദ്യാര്‍ത്ഥി പുലിയെ കണ്ടത്. ഭയന്ന് തിരിഞ്ഞോടിയ വിദ്യാര്‍ത്ഥിയുടെ കൈയിലും കാലിലും പുലി കടിച്ചു. നിലവിളി കേട്ട് ഓടിയെത്തിയവരാണ് കുട്ടിയെ രക്ഷിച്ചത്. പിന്നാലെ പുലിയെ ക്ലാസ് മുറിയില്‍ പൂട്ടിയിട്ടു. പിന്നീട് വനം ഉദ്യോഗസ്ഥരെയും പൊലീസിനെയും വിവരം അറിയിച്ചു.
''ഇന്ന് രാവിലെ വിദ്യാര്‍ത്ഥികള്‍ വരുന്നതിനിടെയാണ് കാമ്പസിനുള്ളില്‍ പുള്ളിപ്പുലി കയറിയത്. ഒരു വിദ്യാര്‍ത്ഥിയെ പുലി ആക്രമിച്ചു. പരുക്കേറ്റ കുട്ടിയെ സര്‍ക്കാര്‍ ആശുപത്രിയില്‍ എത്തിച്ച് ചികിത്സ നല്കി. അവന്‍ ഇപ്പോള്‍ വീട്ടിലാണ്, സുഖമായിരിക്കുന്നു,'' പ്രിന്‍സിപ്പല്‍ യോഗേഷ് യാദവ് പറഞ്ഞു.
