ദുബായ് ഷോപ്പിംഗ് ഫെസ്റ്റിവലിന് ഡിസംബര്‍ 15 ന് തുടക്കമാവും
ഇരുപത്തി ഏഴാമത് ദുബായ് ഷോപ്പിംഗ് ഫെസ്റ്റിവല്‍ ഡിസംബര്‍ 15ന് തുടങ്ങും. എക്സ്പോ 2020 നടക്കുന്നതിനാല്‍ ഇത്തവണ ലോകത്തിന്റെ വിവിധ ഭാഗങ്ങളില്‍ നിന്നും ഷോപ്പിങ് ഫെസ്റ്റിവലിന് വലിയ തിരക്ക് അനുഭവപ്പെടും.
ലോകത്തിലെ എല്ലാ രാജ്യക്കാരും ഒത്തുകൂടുന്ന ഒരു ഷോപ്പിംഗ് ഫെസ്റ്റിവല്‍ കൂടിയായതിനാല്‍ വൈവിധ്യമാര്‍ന്നതും ആകര്‍ഷണീയവുമായ ഒട്ടേറെ പരിപാടികളാണ് ദുബായ് ഷോപ്പിങ് ഫെസ്റ്റിവലിന്റെ ഭാഗമായി ഒരുക്കിയിരിക്കുന്നത്.
മികച്ച വിനോദ പരിപാടികള്‍, സ്റ്റേജ് ഷോകള്‍, വിസ്മയിപ്പിക്കുന്ന കരിമരുന്ന് പ്രയോഗങ്ങള്‍, ഡ്രോണ്‍ ഷോ എന്നിവയ്ക്കു പുറമേ വാണിജ്യ ക്രയവിക്രയങ്ങള്‍ ആകര്‍ഷണീയമാക്കുവാന്‍ ബംബര്‍ നറുക്കെടുപ്പുകളും ഒരുക്കിയിട്ടുണ്ട്.
കൊവിഡിനു ശേഷം ലോകം ഒത്തുചേരുന്ന ഈ മഹാമേളയില്‍ ഷോപ്പിംഗ് അനുഭവം ഏറ്റവും മികച്ചതാക്കാനുള്ള പ്രവര്‍ത്തനങ്ങളാണ് സംഘാടകര്‍ നടത്തുന്നത്. ജനുവരി 29ന് ഷോപ്പിങ് ഫെസ്റ്റിവല്‍ അവസാനിയ്ക്കും.
