മോട്ടോ G31 വില്പന ഇന്ന് മുതല്‍ ഫ്‌ലിപ്പ്കാര്‍ട്ടിലൂടെ, വില 12,999 രൂപ മുതല്‍
മോട്ടോറോള കഴിഞ്ഞ മാസം 29ന് വിപണിയിലെത്തിച്ച മിഡ്‌റേഞ്ച് സ്മാര്ട്ട്ഫോണ് മോട്ടോ G31യുടെ വില്പന ഇന്നാരംഭിക്കും. റെഡ്മി 10 പ്രൈം, റിയല്‍മി 8i എന്നീ സ്മാര്‍ട്ട്‌ഫോണുകളോട് മത്സരിക്കുന്ന മോട്ടോ G31ന്റെ വില്പന ഉച്ചയ്ക്ക് 12 മണി മുതല്‍ ഫ്‌ലിപ്പ്കാര്‍ട്ടിലൂടെയാണ് ക്രമീകരിച്ചിരിക്കുന്നത്. 4 ജിബി റാം + 64 ജിബി സ്റ്റോറേജ്, 6 ജിബി റാം + 128 ജിബി സ്റ്റോറേജ് എന്നിങ്ങനെ രണ്ട് പതിപ്പുകളില്‍ അവതരിപ്പിച്ചിരിക്കുന്ന മോട്ടോ G31ന് യഥാക്രമം 12,999 രൂപയും, 14,999 രൂപയുമാണ് വില. ബേബി ബ്ലൂ, മെറ്റിയോറൈറ്റ് ഗ്രേ നിറങ്ങളില്‍ പുത്തന്‍ മോട്ടോറോള ഫോണ്‍ വാങ്ങാം.
ആന്‍ഡ്രോയിഡ് 11ലാണ് മോട്ടോ G31 പ്രവര്‍ത്തിക്കുന്നത്. ഹൈബ്രിഡ് ഡ്യുവല്‍ സിം സ്ലോട്ടാണ് (നാനോ + നാനോ/ മൈക്രോ എസ്ഡി) മോട്ടോ G31ല്‍ ക്രമീകരിച്ചിരിക്കുന്നത്. 60Hz റിഫ്രഷ് റേറ്റും, 409ppi പിക്സല്‍ ഡെന്‍സിറ്റിയും, 20:9 ആസ്‌പെക്ട് റേഷ്യോയുമുള്ള 6.4-ഇഞ്ച് ഫുള്‍-എച്ച്ഡി+ (1,080x2,400 പിക്സല്‍) OLED ഹോള്‍-പഞ്ച് ഡിസ്പ്ലേയാണ് മോട്ടോ G31ന്. ആം മാലി-G52 MC2 ജിപിയുവുമായി ചേര്‍ന്ന് പ്രവര്‍ത്തിക്കുന്ന മീഡിയടെക് ഹീലിയോ G85 SoC പ്രൊസസ്സറാണ് ഫോണിന്റെ കരുത്ത്. മൈക്രോ എസ്ഡി കാര്‍ഡ് ഉപയോഗിച്ച് ഫോണിന്റെ മെമ്മറി 128 ജിബിയില്‍ നിന്ന് 1 ടിബി വരെയായി വര്‍ദ്ധിപ്പിക്കാം.
50-മെഗാപിക്സല് പ്രധാന സെന്‍സര്‍ എഫ്/1.8 അപ്പര്‍ച്ചര്‍, PDAF, ക്വാഡ്-പിക്സല്‍ സാങ്കേതികവിദ്യ സഹിതമാണ് മോട്ടോ G31ല്‍ അവതരിപ്പിച്ചിരിക്കുന്നത്. ഇതുകൂടാതെ എഫ്/2.2 അപ്പേര്‍ച്ചറും 118-ഡിഗ്രി ഫെല്‍ഡ്-ഓഫ്-വ്യൂ (FoV) ഉള്ള 8-മെഗാപിക്സല് വൈഡ് ആംഗിള്‍ ക്യാമറയും എഫ്/2.4 അപ്പേര്‍ച്ചര്‍ ഉള്ള 2-മെഗാപിക്സല് മാക്രോ സെന്‍സറുമുണ്ട്. ഡ്യുവല്‍ ക്യാപ്ചര്‍, സ്‌പോട്ട് കളര്‍, നൈറ്റ് വിഷന്‍, പോര്‍ട്രെയ്റ്റ്, ലൈവ് ഫില്‍ട്ടര്‍, എആര്‍ സ്റ്റിക്കറുകള്‍, പ്രോ മോഡ് തുടങ്ങിയവയാണ് കാമറ ഫീച്ചറുകള്‍. മുന്‍വശത്ത്, എഫ്/2.2 അപ്പേര്‍ച്ചറുള്ള 13 മെഗാപിക്സല് സെല്‍ഫി ക്യാമറയാണ്.
20W ടര്‍ബോപവര്‍ ഫാസ്റ്റ് ചാര്‍ജിംഗ് പിന്തുണയുള്ള 5,000mAh ബാറ്ററിയാണ് ഹാന്‍ഡ്സെറ്റില്‍ ക്രമീകരിച്ചിരിക്കുന്നത്. 4G എല്‍ടിഇ, 3.5mm ഓഡിയോ ജാക്ക്, ബ്ലൂടൂത്ത് v5, ഡ്യുവല്‍-ബാന്‍ഡ് വൈ-ഫൈ 802.11 ac, യുഎസ്ബി ടൈപ്പ്-സി പോര്‍ട്ട്, ജിപിഎസ്, ഗ്ലോനാസ് എന്നിവയാണ് മോട്ടോ G31ലെ കണക്ടിവിറ്റി ഓപ്ഷനുകള്‍.
