പേടിക്കണം ആന്ധ്രാ വകഭേദത്തെ: പിടികൂടാന്‍ സാധ്യതയേറെ, ഗുരുതരമാകാന്‍ മൂന്ന് ദിവസം മതി
ആന്ധ്രാ പ്രദേശും തെലങ്കാനയും അടക്കമുള്ള സംസ്ഥാനങ്ങളില്‍ ദുരിതം വിതയ്ക്കുന്ന കൊവിഡ് 19ന്റെ പുതിയ വകഭേദദം കൂടുതല്‍ അപകടകരമെന്ന് റിപ്പോര്‍ട്ട്. മുന്‍പ് കണ്ടെത്തിയ ഇന്ത്യന്‍ വകഭേദദങ്ങളെക്കാള്‍ അപകടകരവും 15 ഇരട്ടിയോളം രോഗവ്യാപനശേഷിയുള്ളതുമാണ് പുതിയ വൈറസ് വകഭേദമെന്നാണ് കണ്ടെത്തല്‍.
ഇന്ത്യന്‍ വകഭേദങ്ങളെക്കാള്‍ ഗുരുതരം
ആന്ധ്രാ പ്രദേശിലെ കുര്‍ണൂലിലാണ് എപി വകഭേദം എന്ന് അറിയപ്പെടുന്ന പുതിയ കൊവിഡ് വകഭേദഗം ആദ്യമായി കണ്ടെത്തിയത്. മുന്‍പ് കണ്ടെത്തിയ ഇന്ത്യന്‍ വകഭേദങ്ങളായ ബി1.617, ബി1.618 എന്നിവയെ അപേക്ഷിച്ച് ഇത് കൂടുതല്‍ ശക്തമാണെന്നാണ് ദ ഹിന്ദു റിപ്പോര്‍ട്ടില്‍ പറയുന്നത്. സെന്റര്‍ ഫോര്‍ സെല്ലുലാര്‍ മോളിക്യുലാര്‍ ബയോളജിയിലെ വിദഗ്ധരാണ് പുതിയ വകഭേദം കണ്ടെത്തിയത്. എന്നാല്‍ വിശാഖപട്ടണം അടക്കമുള്ള സ്ഥലങ്ങളില്‍ രണ്ടാം തരംഗത്തില്‍ പടര്‍ന്നു പിടിച്ചത് ഈ വൈറസാണോ എന്ന കാര്യത്തില്‍ വ്യക്തതയില്ല.
പെട്ടെന്നു ഗുരുതരാവസ്ഥയിലെത്തും
പുതിയ ആന്ധ്രാ വകഭേദത്തിന് ഇന്‍ക്യൂബേഷന്‍ പീരിയഡ് കുറവാണെന്നാണ് ആന്ധ്രാ മെഡിക്കല്‍ കോളേജ് പ്രിന്‍സിപ്പാളും ജില്ലാ കൊവിഡ് സ്പെഷ്യല് ഓഫീസറുമായ പിവി സുധാകര്‍ ദ ഹിന്ദുവിനോടു പറഞ്ഞത്. ഇതുമൂലം വൈറസ് ശരീരത്തിലെത്തിയാല്‍ പെട്ടെന്നു തന്നെ രോഗലക്ഷണങ്ങള്‍ പ്രത്യക്ഷപ്പെട്ടു തുടങ്ങും. കൂടാതെ വളരെ പെട്ടെന്നു രോഗം ഗുരുതരമാകുകയും ചെയ്യും. മുന്‍പ് ഒരാഴ്ചയോളം സമയമെടുത്തായിരുന്നു രോഗികള്‍ ഗുരുതരാവസ്ഥയിലെത്തുന്നതെങ്കില്‍ പുതിയ വകഭേദം ബാധിച്ചാല്‍ മൂന്നോ നാലോ ദിവസത്തിനുള്ളില്‍ തന്നെ നില വഷളാകും. ഓക്‌സിജനും ഐസിയു കിടക്കകള്‍ക്കും പെട്ടെന്നു ക്ഷാമമുണ്ടാകാനുള്ള കാരണം ഇതാണെന്നും അദ്ദേഹം പറയുന്നു.
ഏറെ ശ്രദ്ധ വേണം
പഴയ വൈറസ് വകഭേദങ്ങളെ അപേക്ഷിച്ച് വൈറസ് പെട്ടെന്ന് മറ്റുള്ളവരിലേയ്ക്ക് പകരുകയും ചെയ്യും. വളരെ കുറച്ചു സമയം ഇടപഴകിയാല്‍ തന്നെ നാലോ അഞ്ചോ പേരിലേയ്ക്ക് വരെ ഒരേ സമയം വൈറസ് പകര്‍ന്നു നല്‍കും. ചെറുപ്പക്കാരിലും രോഗപ്രതിരോധ ശേഷിയുള്ളവരിലും വൈറസ് ഗുരുതരമായി ബാധിക്കുന്നുണ്ടെന്നും അദ്ദേഹം വിശദമാക്കി.
?കേരളത്തിനും ഭീഷണി
മുന്‍പ് ദക്ഷിണേന്ത്യന്‍ സംസ്ഥാനങ്ങളില്‍ കൊവിഡ് കേസുകള്‍ ഉയരാന്‍ കാരണമായ ബി.1.36 എന്ന വകഭേദവുമായി അടുത്ത ബന്ധമുള്ളതാണ് ആന്ധ്രാ പ്രദേശില്‍ പടരുന്ന പുതിയ വകഭേദമെന്നാണ് കൊവിഡ് ജീനോം സീക്വന്‍സിങ് രംഗത്തു പ്രവര്‍ത്തിക്കുന്ന ദിവ്യ തേജ് സോപതി വ്യക്തമാക്കുന്നത്. എന്നാല്‍ ഈ വകഭേദഗത്തിലുണ്ടായിരുന്ന എന്‍440കെ എന്ന മ്യൂട്ടേഷനെ മറിടകന്ന് നിലവില്‍ ഇന്ത്യയിലെ ഇരട്ട വകഭേദം വന്ന വൈറസും യുകെ വകഭേദഗവുമാണ് ഇന്ത്യയിലെ വിവിധ ഭാഗങ്ങളില്‍ പടരുന്നതെന്ന് സിഎസ്‌ഐആറിലെ ശാസ്ത്രജ്ഞനായ വിനോദ് സ്‌കറിയ ചൂണ്ടിക്കാട്ടി. കേരളം അടക്കമുള്ള ദക്ഷിണേന്ത്യന്‍ സംസ്ഥാനങ്ങളിലും ഈ വകഭേദം തന്നെയാണ് പ്രചരിക്കുന്നത്. എന്‍440കെ എന്ന മ്യൂട്ടേഷനാണ് രോഗം ഗുരുതരമാകാന്‍ സാധ്യത കൂട്ടുന്നത്. ശ്വാസകോശത്തിലേയ്ക്ക് പറ്റിപ്പിടിക്കാനുള്ള വൈറസിന്റെ കഴിവു വര്‍ധിച്ചതോടെ ഡല്‍ഹി അടക്കമുള്ള നഗരങ്ങളില്‍ കേസുകളുടെ എണ്ണം വന്‍തോതില്‍ കൂടുകയായിരുന്നു. അതേസമയം, നിലവില്‍ ആന്ധ്രാ പ്രദേശിലെ നഗരങ്ങളില്‍ ഏതു വകഭേദമാണ് പ്രചരിക്കുന്നതെന്ന കാര്യത്തില്‍ വ്യക്തതയില്ല. ഇത് കണ്ടെത്താനുള്ള പരീക്ഷണങ്ങള്‍ തുടരുകയാണ്.
