ഭീഷണിക്കു വഴങ്ങില്ല: നാളെ കടകള്‍ തുറക്കും
പിന്നോട്ടില്ലെന്ന് വ്യാപാരികള്‍
കോഴിക്കോട്: മുഖ്യമന്ത്രിയുടെ കടുത്ത സ്വരത്തിനു പിന്നാലെ നിലപാടു കടുപ്പിച്ച് വ്യപാരികള്‍. ഒരു ഭീഷണിക്കും വഴങ്ങില്ലെന്നും വ്യാഴാഴ്ച കടകള്‍ തുറക്കുമെന്നും അക്കാര്യത്തില്‍ ഒരു മാറ്റമില്ലെന്നും വ്യാപാരി വ്യവസായി ഏകോപന സമിതി സംസ്ഥാന പ്രസിഡന്റ് ടി. നസിറുദ്ദീന്‍ പറഞ്ഞു. ഇതിനു വലിയ ഭീഷണി മുമ്പും ഉണ്ടായിട്ടുണ്ട്. വ്യാപാരികളുടെ ആവശ്യം ന്യായമാണെന്നാണ് കഴിഞ്ഞ ദിവസം മുഖ്യമന്ത്രി പറഞ്ഞത്. എങ്കില്‍ അതിനെ അംഗീകരിക്കാന്‍ അദ്ദേഹത്തിന് എന്തിനാണ് മടി. ജീവിക്കാനായാണ് കടകള്‍ തുറക്കണമെന്ന് വ്യാപാരികള്‍ ആവശ്യപ്പെടുന്നത്. അല്ലാതെ സര്‍ക്കാരുമായി യുദ്ധ പ്രഖ്യാപനം നടത്താനല്ല.
കോഴിക്കോട്ടെ സമരത്തെ തള്ളിപ്പറയുകയാണ് മുഖ്യമന്ത്രി. എന്തിനാണ് സമരം ചെയ്തതെന്ന് എല്ലാവര്‍ക്കുമറിയാം. കമ്യൂണിസ്റ്റുകാര്‍ക്ക് സമരത്തെ തള്ളിപ്പറയാന്‍ ആവുമോയെന്നും നസിറുദ്ദീന്‍ ചോദിച്ചു.
