പ്രധാനമന്ത്രിക്ക് കര്‍ഷകര്‍ നല്കിയ കത്തിന് ഇതുവരെ മറുപടി ലഭിച്ചില്ല;ആവശ്യങ്ങള്‍ അംഗീകരിക്കുന്നത് വരെ കര്‍ഷക സമരം തുടരും ; കിസാന്‍ യൂണിയന്‍
പ്രധാനമന്ത്രിക്ക് കര്‍ഷകര്‍ നല്കിയ കത്തിന് ഇതുവരെ മറുപടി ലഭിച്ചില്ല. ആവശ്യങ്ങള്‍ അംഗീകരിക്കുന്നത് വരെ സമരത്തില്‍ നിന്ന് പിന്നോട്ടില്ലെന്ന് രാകേഷ് ടികായത്. പാര്‍ലമെന്റ് മാര്ച്ച് സംബന്ധിച്ച അന്തിമ തീരുമാനം നാളത്തെ കിസാന്‍ മോര്‍ച്ച യോഗത്തില്‍ നടക്കും. താങ്ങുവില ഉള്‍പ്പെടെയുള്ള ആവശ്യങ്ങളില്‍ സമരം ശക്തമാക്കുമെന്ന് കിസാന്‍ യൂണിയന്‍ നേതാവ് രാകേഷ് ടികായത് ട്വന്റിഫോറിനോട് പറഞ്ഞു.
പ്രധാനമന്ത്രിക്ക് കര്‍ഷകര്‍ നല്കിയ കത്തിന് ഇതുവരെ മറുപടി ലഭിച്ചിട്ടില്ലെന്ന് അഖിലേന്ത്യാ കിസാന്‍സഭ ജനറല്‍ സെക്രട്ടറി ഹന്നന്‍ മൊള്ള പ്രതികരിച്ചു. ഒരു ദിവസം കൂടി കാത്തിരുന്ന ശേഷം ശക്തമായ സമരത്തിലേക്ക് കടക്കുമെന്ന് അദ്ദേഹം പറഞ്ഞു.
അതേസമയം ഐതിഹാസികമായ കര്‍ഷക സമരത്തിന് ഇന്ന് ഒരു വയസ് തികഞ്ഞു. പഞ്ചാബ്, ഹരിയാന സംസ്ഥാനങ്ങളില്‍ തുടങ്ങിയ സമരമാണ് പിന്നീട് രാജ്യമാകെ കത്തിപ്പടര്‍ന്നത്. കര്‍ഷകസമരത്തിന്റെ ഒന്നാംവാര്‍ഷികമായ ഇന്ന് പ്രതിഷേധം ശക്തമാക്കാനൊരുങ്ങിയിരിക്കുയാണ് കര്‍ഷക സംഘടനകള്‍.
വിവാദ കാര്‍ഷികനിയമങ്ങള്‍ പിന്‍വലിച്ചെങ്കിലും മിനിമം താങ്ങുവില ഉള്‍പ്പെടെ ആറ് ആവശ്യങ്ങളില്‍ തീരുമാനമാകാതെ സമരം അവസാനിപ്പിക്കില്ലെന്ന നിലപാടിലാണ് കര്‍ഷകര്‍. കൃഷി ചെലവിന്റെ ഒന്നര ഇരട്ടി വരുമാനം കര്‍ഷകന് ഉറപ്പാക്കണം എന്ന എം എസ് സ്വാമിനാഥന്‍ കമ്മിഷന്‍ ശുപാര്‍ശയുടെ അടിസ്ഥാനത്തിലാകണം ഇതെന്നും കര്‍ഷകര്‍ ആവശ്യപ്പെടുന്നു.
