വാട്ട്സ് ആപ്പുമായി കൈകോര്‍ത്ത് രാജ്യത്തൊട്ടാകെ തരംഗമാവാന്‍ ജിയോ മാര്‍ട്ട്
കോഴിക്കോട്: മുകേഷ് അംബാനിയുടെ ഇ- കൊമേഴ്സ് സംരംഭമായ ജിയോ മാര്‍ട്ടിനെ വാട്ട്സ് ആപ്പുമായി ബന്ധിപ്പിക്കുന്നു. 40 കോടിപേര്‍ ഉപയോഗിക്കുന്ന രാജ്യത്തെ ഏറ്റവും വലിയ ജനകീയ ആപ്പുമായി ചേര്‍ന്ന് ഗ്രാമങ്ങളില്‍പ്പോലും അതിവേഗം സാനിധ്യമുറപ്പിക്കുകയാണ് റിലയന്‍സിന്റെ ലക്ഷ്യം. അതിവേഗ വളര്‍ച്ചയുള്ള ഓണ്‍ലൈന്‍ റീട്ടെയില്‍ മേഖലയില്‍ ഫ്‌ളിപ്കാര്‍ട്ടിനും ആമസോണിനും ഇത് കനത്ത വെല്ലുവിളിയാകും. 2025ഓടെ 1.3 ലക്ഷം കോടി ഡോളര്‍ മൂല്യമുണ്ടാകുമെന്ന് പ്രതീക്ഷിക്കുന്ന ഓണ്‍ലൈന്‍ റീട്ടെയ്ല്‍ മേഖല പിടിച്ചെടുക്കാനാണ് അംബാനിയുടെ ശ്രമം. ഇതിനകം രാജ്യത്തെ ഏറ്റവും വലിയ ഓഫ്‌ലൈന്‍ റീട്ടെയ്‌ലറായി റിലയന്‍സ് മാറിക്കഴിഞ്ഞു. വാട്ടസ് ആപ്പുമായി കരാറിലെത്തി ഒരു മാസത്തിനകം 200 നഗരങ്ങളില്‍ ജിയോ മാര്‍ട്ട് പ്രവര്‍ത്തനം തുടങ്ങി. റിലയന്‍സ് ഇന്‍ഡസ്ട്രീസിന്റെ തന്നെ ഡിജിറ്റല്‍ യൂണിറ്റായ ജിയോ പ്ലാറ്റ്‌ഫോമില്‍ 5.7 ബില്യണ്‍ ഡോളര്‍ നിക്ഷേപിച്ചതിനു പിന്നാലെയായിരുന്നു ഇത്.
