കോഴിക്കോട്: നാലാമത് പെല്‍വിസ് ജീന്‍സ് സിഗ്മ ഫാഷന്‍ ഫെസ്റ്റിവെല്‍ ആഗസ്റ്റ് 9 മുതല്‍ 11 വരെ കോഴിക്കോട് കാലിക്കറ്റ് ട്രേഡ് സെന്ററില്‍ നടക്കും. രാജ്യത്തിന്റെ വിവിധ ഭാഗങ്ങളില്‍ നിന്നുള്ള 200ല്‍ അധികം വസ്ത്ര നിര്‍മാതാക്കളും മിഡില്‍ ഈസ്റ്റ്, യൂറോപ്പ്, അമേരിക്ക, ആഫ്രിക്ക എന്നിവിടങ്ങളില്‍ നിന്നായി നൂറിലധികം കയറ്റുമതിക്കാരും അയ്യായിരത്തിലധികം ചെറുകിട വ്യാപാരികളും വിതരണക്കാരും പങ്കെടുക്കുമെന്ന് സൗത്ത് ഇന്ത്യ ഗാര്‍മെന്റ് മാനുഫാക്‌ചേഴ്‌സ് അസോസിയേഷന്‍ (സിഗ്മ) ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. മൂന്നു ദിവസങ്ങളിലായി നടക്കുന്ന മേളയില്‍ 150ലധികം സ്റ്റാളുകള്‍ ഉണ്ടാകും. രാജ്യത്തെമ്പാടുമുള്ള വസ്ത്ര നിര്‍മാതാക്കളും വിതരണക്കാരും ഫെസ്റ്റില്‍ തങ്ങളുടെ ബ്രാന്‍ഡുകളും പുതിയ ഉത്പ്പന്നങ്ങളും അവതരിപ്പിക്കും. ഒമ്പതിന് ഫാഷന്‍ ഷോയും അരങ്ങേറും.
വസ്ത്ര നിര്‍മാണ മേഖലയില്‍ പ്രവര്‍ത്തിക്കുന്നവരുടെ രാജ്യത്തെ പ്രമുഖ സംഘടനയാണ് സിഗ്മ. മേഖലയിലെ 200ലധികം സംരഭകര്‍ സംഘടനയില്‍ അംഗങ്ങളാണ്. ഫാഷന്‍ രംഗത്തെ ഏറ്റവും പുതിയ ട്രെന്‍ഡുകളെയും സാങ്കേതിക വിദ്യയെയും കുറിച്ച് അംഗങ്ങളില്‍ അവബോധം സൃഷ്ടിക്കുക, മേളകളിലൂടെയും പ്രദര്‍ശനങ്ങളിലൂടെയും വ്യാപാരം വര്‍ധിപ്പിക്കുക എന്നിവയാണ് സംഘടനയുടെ ലക്ഷ്യം.മേളയില്‍ സന്ദര്‍ശകരായി എത്തുന്ന ചെറുകിട വ്യാപാരികളില്‍ നിന്ന് നറുക്കെടുപ്പിലൂടെ തെരഞ്ഞെടുക്കുന്ന ഭാഗ്യശാലിക്ക് ബിഎംഡബ്ലു ജി-310 സ്‌പോര്‍ട്‌സ് ബൈക്ക് സമ്മാനമായി നല്‍കും. വാര്‍ത്താ സമ്മേളനത്തില്‍ സിഗ്മ വൈസ് പ്രസിഡന്റ് അബ്ദുള്‍ അസീസ്, ജനറല്‍ സെക്രട്ടറി അബ്ബാസ് അദ്ധറ, ട്രഷറര്‍ ഷരീഫ് കെ.എച്ച്, ഫാഷന്‍ ഫെസ്റ്റിവെല്‍ ചെയര്‍മാന്‍ ഫിറോസ് ഖാന്, കണ്‍വീനര്‍ ഹിര്‍ഷാദ് അഹമ്മദ് എന്നിവര്‍ പങ്കെടുത്തു.
