നോക്കിയ ജി-സീരീസ്, എക്‌സ്-സീരീസ് സ്മാർട്ട്‌ഫോണുകൾ ഏപ്രിൽ 8 ന് വിപണിയിൽ.
നോക്കിയ ബ്രാൻഡ് ലൈസൻസിയായ എച്ച്എംഡി ഗ്ലോബൽ ഏപ്രിൽ 8 ന് വിപണിയിൽ എത്തിക്കാൻ ഒരുങ്ങുകയാണ് കമ്പനി. ഈ പുതിയ എക്‌സ്-സീരീസ്, ജി-സീരീസ് എന്നിവയിൽ കമ്പനി ഒന്നിലധികം സ്മാർട്ട്‌ഫോണുകൾ അവതരിപ്പിക്കുമെന്ന് കമ്പനി പറയുന്നു. നോക്കിയയുടെ ജി 10, നോക്കിയ ജി 20, നോക്കിയ എക്‌സ് 10, നോക്കിയ എക്‌സ് 20 ഫോണുകൾ വിപണിയിലെത്തിക്കാൻ കഴിയുമെന്നാണ് റിപ്പോർട്ടുകൾ സൂചിപ്പിക്കുന്നത്. ഈ ലോഞ്ച് ഇവന്റ് ഏപ്രിൽ 8 ന് വൈകുന്നേരം കൃത്യം 7:30 മണിക്ക് നടക്കും. ഓൺലൈൻ ഇവന്റിൽ മാത്രം ഏത് സ്മാർട്ട്‌ഫോണുകൾ അവതരിപ്പിക്കുമെന്നതിനെക്കുറിച്ചുള്ള വിശദാംശങ്ങളൊന്നും കമ്പനി അയച്ച ക്ഷണങ്ങളിൽ പറയുന്നില്ല.
നോക്കിയ ജി 10 യൂറോ 139 (ഏകദേശം 11,900 രൂപ), നോക്കിയ ജി 20 യൂറോ 169 (ഏകദേശം 14,500 രൂപ) എന്നിങ്ങനെ യഥാക്രമം വിലയിലായിരിക്കും തുടക്കം . ഈ രണ്ട് ഹാൻഡ്സെറ്റുകളും ബ്ലൂ, പർപ്പിൾ കളർ ഓപ്ഷനുകളിൽ അവതരിപ്പിക്കുമെന്ന് പറയുന്നു. ഇതിൻറെ ബേസിക് വേരിയന്റായ നോക്കിയ എക്‌സ് 10 ന് യൂറോ 300 (ഏകദേശം 25,800 രൂപ) വിലയും, നോക്കിയ എക്‌സ് 20 യൂറോ 349 (ഏകദേശം 30,000 രൂപ) വില ആരംഭിക്കുമെന്നാണ് പ്രതീക്ഷിക്കുന്നത്. നോക്കിയ എക്‌സ് 10 ഗ്രീൻ ആൻഡ് വൈറ്റ് കളർ ഓപ്ഷനിലും, എക്‌സ് 20 ബ്ലൂ, സാൻഡ് കളർ ഓപ്ഷനുകളിൽ വരും.
ഈ ഹാൻഡ്‌സെറ്റുകൾ ഗൂഗിളിൻറെ ആൻഡ്രോയിഡ് 11 ഓപ്പറേറ്റിംഗ് സിസ്റ്റത്തിൽ പ്രവർത്തിക്കും, കൂടാതെ 10W ചാർജിംഗിനുള്ള സപ്പോർട്ട് വരുന്ന 5,000 എംഎഎച്ച് ബാറ്ററിയും ഇതിൽ ഉൾപ്പെടുത്തും. 48 മെഗാപിക്സൽ പ്രൈമറി സെൻസർ, 2 മെഗാപിക്സൽ ഡെപ്ത് സെൻസർ, 5 മെഗാപിക്സൽ അൾട്രാ വൈഡ് ആംഗിൾ ലെൻസ്, 2 മെഗാപിക്സൽ മാക്രോ ലെൻസ് എന്നിവ ഉൾപ്പെടുന്ന രണ്ട് ഡിവൈസുകൾക്കും പിന്നിൽ ഒരേ ക്വാഡ് ക്യാമറ സെറ്റപ്പ് ഉണ്ടാകും. മുൻവശത്ത്, സെൽഫികൾ പകർത്തുവാൻ 8 മെഗാപിക്സൽ സെൻസറും നൽകും.
