ഐസ്‌ക്രീം ബോംബ് പൊട്ടിത്തെറിച്ചു;
കണ്ണൂരില്‍ പന്ത്രണ്ടുകാരിന് നെഞ്ചിനും കാലിനും പരിക്ക്
കണ്ണൂര്‍: കണ്ണൂര്‍ ധര്‍മ്മടത്ത് കളിക്കുന്നതിനിടെ ബോംബ് പൊട്ടി കുട്ടിക്ക് പരിക്ക്. ധര്‍മ്മടം പാലാട് നരിവയലിലാണ് സംഭവം. കളിക്കുന്നതിനിടെ കയ്യില്‍ കിട്ടിയ ഐസ്‌ക്രീം ബോള്‍ എടുത്തെറിഞ്ഞപ്പോഴാണ് സ്ഫോടനം ഉണ്ടായത്. പന്ത്രണ്ട് വയസുള്ള കുട്ടിയുടെ നെഞ്ചിനും കാലിനും പരിക്കേറ്റിട്ടുണ്ട്. പരിക്കേറ്റ നരിവയല്‍ സ്വദേശി ശ്രീവര്‍ധിനെ തലശ്ശേരിയിലെ സ്വകാര്യ ആശുപത്രിയില്‍ പ്രവേശിപ്പിച്ചു.
കുട്ടിയുടെ പരിക്കുകള്‍ സാരമുള്ളതല്ലെന്നാണ് ആശുപത്രിയില്‍ നിന്ന് ലഭിക്കുന്ന വിവരം. പറമ്പില്‍ മറ്റ് കുട്ടികള്‍ക്കൊപ്പം ക്രിക്കറ്റ് കളിക്കുകയായിരുന്നു ശ്രീധര്‍വ്, ഇതിനിടിയില്‍ പന്ത് അടുത്തുള്ള പറമ്പിലേക്ക് പോയി. ഇത് തിരിച്ചെടുക്കാന്‍ ചെന്നപ്പോഴാണ് ഐസ്‌ക്രീം ബോള്‍ കണ്ടത്. മൂന്ന് ഐസ്‌ക്രീം ബോംബുകളാണ് കുട്ടിക്ക് പറമ്പില്‍ നിന്ന് കിട്ടിയത്. ബോംബാണെന്ന് തിരിച്ചറിയാതെ ഇതെടുത്ത് തിരിച്ച് കൊണ്ടുവന്ന് കളി തുടരുകയായിരുന്നു. അതിനിടെയാണ് സ്ഫോടനം, പ്രദേശത്ത് പൊലീസ് തിരച്ചില്‍ നടത്തുകയാണ്.
