ലക്ഷണമൊത്ത പശുക്കിടാവ്: ലേലത്തില്‍
വിറ്റത് രണ്ടര കോടിയിലധികം രൂപയ്ക്ക്
ലണ്ടന്‍: ബ്രിട്ടനില്‍ ലിമോസിന്‍ ഇനത്തില്‍പ്പെട്ട പെഡിഗ്രി പശുക്കിടാവ് ലേലത്തില്‍ വിറ്റത് റെക്കോര്‍ഡ് വിലയ്ക്ക്. വിലോഡ്ജ് പോഷ്‌പൈസ് എന്നു പേരുള്ള പശുക്കിടാവിന് 360,000 ഡോളര്‍ ആണ് ലേലത്തില്‍ ലഭിച്ചത്. അതായത് 2,62,03,788 കോടി രൂപ. ഇതോടെ ലിമോസിന്‍ ഇനത്തില്‍പ്പെട്ട പശുക്കളില്‍ ഏറ്റവും വിലയേറിയ പശുവെന്ന ലോക റെക്കോര്‍ഡും പതിനാലുമാസം മാത്രം പ്രായമുള്ള പോഷ്‌പൈസ് സ്വന്തമാക്കി.
ബ്രിട്ടീഷ് ലിമോസിന്‍ കന്നുകാലി സൊസൈറ്റിയുടെ കണക്കനുസരിച്ച് യുകെയിലും യൂറോപ്പിലെ ഏറ്റവും ചെലവേറിയ പശുക്കിടാായി പോഷ്‌പൈസ് മാറി. 2014 ല്‍ നടന്ന ലേലത്തില്‍ വിറ്റ ഗ്ലന്റോക്ക് ഇല്യൂഷന്‍ എന്ന പശുക്കിടാവായിരുന്നു നേരത്തെ ഈ റെക്കോര്‍ഡിന് ഉടമ.1,31,250 പൗണ്ടിനായിരുന്നു ഗ്ലന്റോക്ക് ലേലത്തില്‍ പോയത്. ഷ്രോപ്പ്ഷയറിലെ ലോഡ്ജ് ഹില്‍ ഫാം സ്വദേശികളായ ക്രിസ്റ്റീന്‍ വില്യംസും പോള്‍ ടിപ്പറ്റ്‌സുമാണ് പശുക്കിടാവിനെ ലേലത്തില്‍ വച്ചത്.
കൊവിഡ് പ്രതിസന്ധി നിലനില്‍ക്കുന്നതിനാല്‍ ലേലം നടക്കുമോ എന്ന് പോലും ഉറപ്പില്ലായിരുന്നു. എന്നാല്‍ ലക്ഷണമൊത്ത പശുക്കിടാവായതിനാല്‍ പോഷ്‌പൈസ് പെട്ടെന്നുതന്നെ വാങ്ങാനെത്തിയവരുടെ ശ്രദ്ധയാകര്‍ഷിക്കുകയായിരുന്നുവെന്നും ഉടമകള്‍ പറയുന്നു. കംബ്രിയയിലെ എഡബ്ല്യു ജെന്‍കിന്‍സണ്‍ ഫാമിലെ ക്രെയ്ഗ് ഡഗ്ലസ് ആണ് കോടികള്‍ മുടക്കി പോഷ്‌പൈസിനെ ലേലത്തില്‍ സ്വന്തമാക്കിയത്. പോഷ്‌പൈസിനെ കിട്ടിയതില്‍ താന്‍ അതീവ സന്തുഷ്ടനാണെന്നും നല്ല ലക്ഷണമൊത്ത പശുക്കിടാവാണിതെന്നും ഡഗ്ലസ് പറഞ്ഞു.
