തിരുവനന്തപുരം: സംസ്ഥാനത്ത് ഇന്ന് സ്വര്ണവില വീണ്ടും റെക്കോര്ഡ് ഭേദിച്ചു. രാവിലെ റെക്കോര്ഡ് വിലയിലായിരുന്നു സ്വര്ണവില. വീണ്ടും ഉച്ചയ്ക്ക് വില വര്ദ്ധിക്കുകയാണ് ഉണ്ടായത്. ഒരു പവന് 22 കാരറ്റ് സ്വര്ണത്തിന്റെ വിപണി വില നിലവില് 99,280 രൂപയാണ്. രാവിലെ 600 രൂപയാണ് പവന് വര്ദ്ധിച്ചത്. ഉച്ചയ്ക്ക് 360 രൂപയും. ഏറ്റവും കുറഞ്ഞ പണിക്കൂലിയായ 5 ശതമാനവും ജിഎസ്ടി മൂന്ന് ശതമാനവും ഹാള്മാര്ക്കിങ് ചാര്ജും ചേര്ത്താല് ഇന്ന് ഒരു പവന് സ്വര്ണാഭരണം വാങ്ങാന് ഒന്നര ലക്ഷത്തിന് അടുത്ത് നല്കണം.
ഫെഡറല് റിസര്വ് പലിശ നിരക്ക് കുറച്ചതിനെത്തുടര്ന്ന് യുഎസ് ഡോളറിന്റെ മൂല്യം കുറഞ്ഞതും സുരക്ഷിത നിക്ഷേപമെന്ന നിലയില് ഡിമാന്ഡ് നിലനില്ക്കുന്നതും കാരണമാണ് സ്വര്ണ്ണ വില എക്കാലത്തെയും ഉയര്ന്ന നിലയിലേക്ക് എത്താന് കാരണമായത്. ഓള് കേരള ഗോള്ഡ് ആന്ഡ് സില്വര് മര്ച്ചന്റ് അസേസിയേഷന് അന്താരാഷ്ട്ര വിലയെ അനുസൃതമാക്കിയാണ് കേരളത്തില് വില നിശ്ചയിക്കുന്നത്. അന്താരാഷ്ട്ര വിപണി നിരക്കുകള്, ഇറക്കുമതി തീരുവകള്, നികുതികള്, വിനിമയ നിരക്കുകളിലെ ഏറ്റക്കുറച്ചിലുകള് എന്നിവയാണ് പ്രധാനമായും ഇന്ത്യയിലെ സ്വര്ണ്ണ വിലയെ സ്വാധീനിക്കുന്നത്.
സ്വര്ണവില റെക്കോഡുകള് തകര്ക്കുന്നത് ഉപഭോക്താക്കളെ ആശങ്കയിലാക്കിയിട്ടുണ്ട്. പ്രത്യേകിച്ച് വിവാഹ വിപണിയെ, രാജ്യത്ത് ഏറ്റവും കൂടുതല് വിവാഹം അടുത്ത രണ്ട് മാസങ്ങളില് നടക്കും എന്നിരിക്കെ സ്വര്ണവില കൂടുന്നത് തിരിച്ചടിയാണ്.
r
