ലഖിംപൂരില്‍ നടന്നത് ക്രൂരമായ കൊലപാതകം;
അന്വേഷണത്തില്‍ തൃപ്തിയില്ലെന്ന് സുപ്രീംകോടതി
ദില്ലി: ലഖിംപൂര്‍ സംഘര്‍ഷം സംബന്ധിച്ച കേസില്‍ യുപി സര്‍ക്കാരിനെതിരെ ആഞ്ഞടിച്ച് സുപ്രീംകോടതി. അന്വേഷണത്തില്‍ തൃപ്തിയില്ലെന്ന് സുപ്രീംകോടതി പറഞ്ഞു. കേസ് പൂജ അവധിക്ക്. ശേഷം പരിഗണിക്കുമെന്നും കേസില്‍ അതിന് മുമ്പ് ശക്തമായ നടപടി ഉണ്ടാകണമെന്ന് കോടതി നിര്‍ദ്ദേശിച്ചു. അതേസമയം, സംഭവത്തില്‍ പങ്കില്ലെന്ന് ആവര്‍ത്തിച്ച കേന്ദ്രമന്ത്രി അജയ് മിശ്ര, അന്വേഷണത്തില്‍ വിശ്വാസമുണ്ടെന്നും കോടതിയില്‍ പറഞ്ഞു.
ഗുരുതരമായ കേസുകളില്‍ ഇങ്ങനെയാണോ പെരുമാറേണ്ടത് എന്ന് സുപ്രീംകോടതി ചോദിച്ചു. ക്രൂരമായ കൊലപാതകമാണ് ലഖിംപൂരില്‍ നടന്നത്. എന്നാല്‍, സര്‍ക്കാര്‍ നടപടി വാക്കുകളില്‍ ഒതുങ്ങുന്നുവെന്ന് ചീഫ് ജസ്റ്റിസ് വിമര്‍ശിച്ചു. ലഖിംപൂരില്‍ വെടിവയ്പ് നടന്നിട്ടില്ലെന്നും സിബിഐ അന്വേഷണം ആകാമെന്നും യുപി സര്‍ക്കാര്‍ കോടതിയില്‍ പറഞ്ഞു. എന്നാല്‍, കേസില്‍ ഉള്‍പ്പെട്ട വ്യക്തികളെ നോക്കുമ്പോള്‍ സിബിഐ അന്വേഷണത്തിലും കാര്യമില്ലെന്നും മറ്റൊരു സംവിധാനം അന്വേഷണം നടത്തേണ്ടി വരുമെന്ന് കോടതി നിരീക്ഷീച്ചു.
