സഹകരണ ബാങ്കുകളിലെ വായ്പ പലിശ
നിരക്ക് കുറച്ചു, നിക്ഷേപങ്ങളുടേയും
തിരുവനന്തപുരം: സംസ്ഥാനത്തെ സഹകരണ ബാങ്കുകളിലെ വായ്പ പലിശ നിരക്ക് കുറച്ചു. പ്രാഥമിക വായ്പ സഹകരണ സംഘങ്ങള്‍ (സര്‍വീസ് സഹകരണ ബാങ്കുകള്‍), മലപ്പുറം ജില്ലാ സഹകരണ ബാങ്ക്, കേരള സംസ്ഥാന സഹകരണ ബാങ്ക് (കേരള ബാങ്ക്) എന്നിവ വിതരണം ചെയ്യുന്ന കാര്‍ഷികേതര വായ്പകള്‍ക്കും അനുബന്ധ വായ്പകള്‍ക്കും ഈടാക്കുന്ന പലിശ നിരക്കാണ് കുറച്ചത്. എട്ടര മുതല്‍ 12 ശതമാനം വരെയാണ് വിവിധ വായ്പകള്‍ക്ക് നല്‍കുന്ന പലിശ നിരക്ക്.
ബാങ്കുകള്‍ നല്‍കുന്ന സ്ഥിര നിക്ഷേപങ്ങളുടെ പലിശ നിരക്കും കുറച്ചിട്ടുണ്ട്. വിവിധ കാലയളവിലുള്ള സ്ഥിര നിക്ഷേപങ്ങള്‍ക്ക് അര ശതമാനം വീതമാണ് പലിശ കുറച്ചത്. നാലര മുതല്‍ 6.75 ശതമാനം വരെയാണ് സ്ഥിര നിക്ഷേപങ്ങളുടെ പലിശ. ഭവന, വിദ്യാഭ്യാസ, സ്വര്‍ണ, വ്യവസായ, ചികിത്സാ വായ്പകള്‍ അടക്കമുള്ള മറ്റു വായ്പകളുടെയും പലിശ കുറച്ചിട്ടുണ്ട്. ഭവന വായ്പകള്‍ക്ക് അര ശതമാനം വരെ പലിശയാണ് കുറച്ചത്.
കേന്ദ്ര സംസ്ഥാന സര്‍ക്കാരുകളുടെ പ്രത്യേക സ്‌കീമില്‍ ഉള്‍പ്പെടുന്ന വായ്പകള്‍ക്ക് ഈ നിരക്കുകള്‍ ബാധകമല്ല. മുതിര്‍ന്ന പൗരന്മാര്ക്ക് അരശതമാനം പലിശ അധികം ലഭിക്കും. സേവിങ്സ് നിക്ഷേപങ്ങളുടെ പലിശ നിരക്ക് പുതുക്കിയിട്ടില്ല. പലിശ നിര്‍ണയ ഉപസമിതിയുടെ തീരുമാന പ്രകാരമാണ് പലിശ നിരക്കില്‍ മാറ്റം വരുത്തിയത്.
