റിയല്‍മി C25 ബജറ്റ് സ്മാര്ട്ട്ഫോണ് വില്പന ഇന്നാരംഭിക്കും; വില 9,999 രൂപ മുതല്‍
ചൈനീസ് സ്മാര്ട്ട്ഫോണ് നിര്‍മ്മാതാക്കളായ റിയല്‍മി കഴിഞ്ഞ ആഴ്ച വിപണിയില്‍ എത്തിച്ച പുത്തന്‍ C സീരീസ് ബജറ്റ് സ്മാര്‍ട്ട്‌ഫോണുകളില്‍ ഏറ്റവും പ്രീമിയം മോഡല്‍ ആയ റിയല്‍മി C25-യുടെ വില്പന ഇന്നാരംഭിക്കും. 4 ജിബി റാം + 64 ജിബി സ്റ്റോറേജ് പതിപ്പിന് 9,999 രൂപ, 4 ജിബി റാം + 128 ജിബി സ്റ്റോറേജ് പതിപ്പിന് 10,999 രൂപ എന്നിങ്ങനെയാണ് വില. വാട്ടറി ബ്ലൂ, വാട്ടറി ഗ്രേ എന്നിങ്ങനെ രണ്ട് നിറങ്ങളില്‍ വിപണിയിലെത്തിയിരിക്കുന്ന റിയല്‍മി C25-ന്റെ വില്പന ഉച്ചയ്ക്ക് 12 മണി മുതല്‍ ഫ്‌ലിപ്കാര്‍ട്ട്, റിയല്‍മി.കോം വെബ്സൈറ്റുകളിലൂടെയും ഓഫ്ലൈന്‍ സ്റ്റോറുകളിലൂടെയുമാണ് ആരംഭിക്കുക. ഫ്‌ലിപ്കാര്‍ട്ട് ആക്‌സിസ് ബാങ്ക് ക്രെഡിറ്റ് കാര്‍ഡ് ഉപയോഗിച്ച് ഫോണ്‍ വാങ്ങുമ്പോള്‍ 5 ശതമാനം കാഷ്ബാക്കും ലോഞ്ച് ഓഫറായി ക്രമീകരിച്ചിട്ടുണ്ട്.
ഡ്യുവല്‍ സിം (നാനോ) ഫോണ്‍ ആയ റിയല്‍മി C25, ആന്‍ഡ്രോയിഡ് 11 അടിസ്ഥാനമായ റിയല്‍മി യുഐ 2.0 ഓപ്പറേറ്റിംഗ് സിസ്റ്റത്തിലാണ് പ്രവര്‍ത്തിക്കുന്നത്. 20:9 ആസ്‌പെക്ട് റേഷ്യോയുള്ള 6.5 ഇഞ്ച് എച്ച്ഡി + (720x1,600 പിക്സല്‍) ഡിസ്പ്ലേയാണ് റിയല്‍മി C25-ന്. 4 ജിബി റാമിനൊപ്പം ഒക്ടാകോര്‍ മീഡിയടെക് ഹെലിയോ G70 SoC പ്രൊസസ്സറിലാണ് ഹാന്‍ഡ്‌സെറ്റ് പ്രവര്‍ത്തിക്കുന്നത്.
48 മെഗാപിക്സല് പ്രൈമറി സെന്‍സര്‍, 2 മെഗാപിക്സല് മോണോക്രോം സെന്‍സര്‍, 2 മെഗാപിക്സല് മാക്രോ ഷൂട്ടര്‍ എന്നിവയുള്ള ട്രിപ്പിള്‍ റിയര്‍ ക്യാമറ സജ്ജീകരണമുണ്ട്. 8 മെഗാപിക്സല് സെല്‍ഫി ക്യാമറ സെന്‍സറും ഫോണിലുണ്ട്. ബജറ്റ് സ്മാര്ട്ട്ഫോണ് ആണെങ്കിലും ബ്യൂട്ടി മോഡ്, എച്ഡിആര്‍, പനോരാമിക് വ്യൂ, പോര്‍ട്രൈറ്റ്, ടൈംലാപ്‌സ്, സ്ലോ-മോ, നൈറ്റ്‌സ്‌കേപ്പ് തുടങ്ങിയ കാമറ ഫീച്ചറുകള്‍ ഫോണില്‍ ഉള്‍പെടുത്തിയിട്ടുണ്ട്.
128 ജിബി വരെ ഇന്റേണല്‍ സ്റ്റോറേജുള്ള C25-ന്റെ മെമ്മറി ഒരു മൈക്രോ എസ്ഡി കാര്‍ഡ് വഴി 256 ജിബി വരെ വര്‍ദ്ധിപ്പിക്കാം. 18W ഫാസ്റ്റ് ചാര്‍ജിംഗ് പിന്തുണയുള്ള 6,000 എംഎഎച്ച് ബാറ്ററിയാണ് ഫോണില്‍. 4ജി എല്‍ടിഇ, ഡ്യുവല്‍-ബാന്‍ഡ് വൈ-ഫൈ, ബ്ലൂടൂത്ത് 5.1, ജിപിഎസ് എന്നിവയാണ് റിയല്‍മി C25-ലെ കണക്ടിവിറ്റി ഓപ്ഷനുകള്‍.
