ന്യൂയോര്‍ക്കില്‍ തലശേരി ബിരിയണി വിളമ്പി പ്രിയങ്ക ചോപ്ര .
സിനിമയ്‌ക്കൊപ്പം ബിസിനസ്സിലേക്കും ചുവടുവച്ച ബോളിവുഡ് താരമാണ് പ്രിയങ്ക ചോപ്ര. തൊട്ടതെല്ലാം പൊന്നാക്കുന്ന പ്രിയങ്കയുടെ ഏറ്റവും പുതിയ സംരംഭത്തിന് ന്യൂയോര്‍ക്കില്‍ തുടക്കമിട്ടു. ന്യൂയോര്‍ക്ക് നഗരത്തിന്റെ ഹൃദയഭാഗത്ത് ഒരു കിടിലന്‍ ഇന്ത്യന്‍ റെസ്റ്റോറന്റ ആണ് താരം തുടങ്ങിയത്. സോന എന്ന പേരില്‍ ആരംഭിച്ച റെസ്റ്റോറന്റ് മലബാര്‍ വിഭവമായ തലശ്ശേരി ബിരിയാണി മുതല്‍ ഉത്തരേന്ത്യന്‍ വിഭവമായ ഗോല്‍ഗപ്പ വരെ വിളമ്പും. പ്രശസ്ത ഷെഫ് ഹരി നായക് ആണ് പ്രിയങ്കയുടെ സോനയിലെ താരം. അദ്ദേഹമാണ് അതിഥികള്‍ക്കായി ഭക്ഷണമൊരുക്കുന്നത്.
പരമ്പരാഗത ഇന്ത്യന്‍ കൊട്ടാരങ്ങളെ ഓര്‍മ്മിപ്പിക്കും വിധമാണ് സോനയുടെ പണിക്കഴിപ്പിച്ചിരിക്കുന്നത്. ഡിസൈനര്‍ മെലിസ ബോവേഴ്‌സ് ആണ് റെസ്റ്റോറന്റിന്റെ ഇന്റീരിയര്‍ ഒരുക്കിയിരിക്കുന്നത്. വിന്റേജ് മോഡലിലുള്ള ഫര്‍ണിച്ചറുകളും മഞ്ഞ നിറത്തിലുള്ള ലൈറ്റുകളുമാണ് റെസ്റ്റോറന്റിന് ഭംഗി കൂട്ടുന്നത്. വെള്ളയും സ്വര്‍ണനിറവും അകത്തളത്തിന് മോടി കൂടുന്നുണ്ട്. ആക്‌സന്റ് ലൈറ്റിങ് ആണ് അകത്തളം ഭംഗിയാക്കാന്‍ കൂടുതലായും ഉപയോഗിച്ചിരിക്കുന്നത്.
ഡൈനിങ്ങിന് പുറമേ സോനയില്‍ ഒരു ബാറും ഉണ്ട്. ഇന്ത്യയിലെ ചളികൊണ്ടുണ്ടാക്കിയ വീടുമായി സാദൃശ്യമുള്ളസാണ് സോനയിലെ ബാര്‍. 8 മുതല്‍ 30 അതിഥികള്‍ക്ക് ഒരേസമയ ഇരിക്കാവുന്നതാണ് സോനയിലെ ഡൈനിങ് ഏരിയ. സിറ്റിങ് ബൂത്തിനടുത്തായി നിറയെ കണ്ണാടികളാല്‍ അലങ്കരിച്ചിട്ടുണ്ട്. വെള്ളയും പച്ചയും കലര്‍ന്ന ചെറിയ വിളക്കുകളാണ് റെസ്റ്റോറന്റിന്റെ മറ്റൊരു പ്രത്യേകത.
ടെക്വില ഗോള്‍ഗപ്പ, മാംഗോ പാഷന്‍ സോര്‍ബെറ്റ്, സോണ ചോക്ലേറ്റ് ഗേറ്റാക്‌സ്, , ക്രാബ് പുരി, കാവിയാര്‍, ടെര്‍മറിക് എഡാമേം മാഷ്, തേങ്ങ ചട്ണി, ദോശ, ദാഹി കച്ചോരി, കോഫ്ത കുര്‍മ, ഗജര്‍ ഹല്‍വ, ബട്ടര്‍ ചിക്കന്‍, മുളക് ചീസ് നാന്‍, കശുവണ്ടി സോസ്, ഗോട്ട് ചീസ് സമോസ, സിട്രസ് ചില്ലി ഹണി ഡ്രസിങ്, സമോസ, അപ്പം, തലശ്ശേരി ബിരിയാണി തുടങ്ങിയ ഇന്ത്യന്‍ വിഭവങ്ങളാണ് പ്രിയങ്കയുടെ സോനയില്‍ വിളമ്പുന്നത്.
2019ലാണ് സോനയുടെ പണി തുടങ്ങിയത്. സുഹൃത്തുക്കളായ മനീഷ് ഗോയലും ഡേവിഡ് റാബും പ്രിയങ്കയുടെ സംരഭത്തില്‍ പങ്കാളികളായിട്ടുണ്ട്. 2019 സെപ്റ്റംബറില്‍ പ്രിയങ്കയും ഭര്‍ത്താവ് നിക്ക് ജൊനാസും സോനയുടെ നിര്‍മ്മാണത്തിന് മുമ്പുള്ള പൂജയുടെ ചിത്രങ്ങള്‍ പങ്കുവച്ചിരുന്നു. മാര്‍ച്ച് മാസം അവസാനമാണ് സോന പൊതുജനങ്ങള്‍ക്കായി തുറന്നത്. എല്ലാ ചൊവ്വ, വ്യാഴം, ശനി ദിവസങ്ങളിലാണ് ഇവിടെ അത്താഴം വിളമ്പുക.
പ്രിയങ്കയുടെ നിരവധി സംരംഭങ്ങളില്‍ ഒന്ന് മാത്രമാണ് ഈ റെസ്റ്റോറന്റ്. പര്‍പ്പിള്‍ പെബിള്‍ പിക്‌ചേഴ്‌സ് എന്ന പേരില്‍ ഒരു പ്രൊഡക്ഷന്‍ ഹൗസും ഹെയര്‍ കെയര്‍ ഉത്പന്നമായ അനോമലി എന്നിങ്ങനെ വെറേയും ഒട്ടനവധി സംരംഭങ്ങളും താരത്തിനുണ്ട്. അടുത്തിടെ ഡേറ്റിങ് ആപ്ലിക്കേഷനായ ബംബിളിലും താരം നിക്ഷേപം നടത്തിയിരിന്നു.
