പുതുതായി എട്ട് സര്‍വ്വീസുകള്‍ ആരംഭിക്കാന്‍ ഇന്‍ഡിഗോ തയാറെടുക്കുന്നു; സെപ്തംബര്‍ ആദ്യവാരം മുതല്‍ പുതിയ സര്‍വ്വീസ്
ന്യൂഡെല്‍ഹി: പുതുതായി എട്ട് വിമാന സര്‍വീസുകള്‍ ആരംഭിക്കാന്‍ ബജറ്റ് വിമാനക്കമ്പനിയായ ഇന്‍ഡിഗോ തയാറെടുക്കുന്നു. സെപ്തംബര്‍ ആദ്യവാരം മുതല്‍ പുതിയ റൂട്ടുകളില്‍ സര്‍വീസ് നടത്താനാണ് കമ്പനിയുടെ നീക്കം. ആഭ്യന്തര വിമാന സര്‍വീസുകളാണ് ഇന്‍ഡിഗോ ആരംഭിക്കുന്നത്.
ഡെഹ്‌റാഡൂണ്‍, ഇന്‍ഡോര്‍, ലഖ്നൗ വിമാനത്താവളങ്ങളെ തമ്മില്‍ ബന്ധിപ്പിച്ചാണ് വിമാന സര്‍വീസുകള്‍. ഡെല്‍ഹി - ലഖ്നൗ, ലഖ്നൗ - ജയ്പൂര്‍, ഇന്‍ഡോര്‍ - ലഖ്നൗ എന്നീ റൂട്ടുകളിലെ സര്‍വീസ് സെപ്തംബര്‍ ഒന്ന് മുതല്‍ നിലവില്‍ വരും. ദില്ലിയെയും ഡെഹ്‌റാഡൂണിനെയും ബന്ധിപ്പിക്കുന്ന സര്‍വീസ് സെപ്തംബര്‍ അഞ്ച് മുതലാണ് ആരംഭിക്കുക.
ഈ മേഖലയില്‍ നിന്നുള്ള യാത്രക്കാര്‍ക്ക് ഏറെ ആശ്വാസകരമാകുന്നതാണ് ഇന്റിഗോയുടെ തീരുമാനം. വിമാന സര്‍വീസുകളുടെ എണ്ണം കൂടുമെന്നത് മാത്രമല്ല ഇതിന് കാരണം. ദില്ലി, ലഖ്നൗ, ജെയ്പൂര്‍, ഡെഹ്‌റാഡൂണ്‍, ഇന്‍ഡോര്‍ എന്നിവിടങ്ങളിലെ വര്‍ധിച്ചു വരുന്ന യാത്രാ ആവശ്യത്തിന് ഒരു പരിഹാരവുമാകും കമ്പനിയുടെ തീരുമാനമെന്ന് ഇന്റിഗോയുടെ ചീഫ് സ്ട്രാറ്റജി ആന്റ് റവന്യു ഓഫീസറായ സഞ്ജയ് കുമാര്‍ പറഞ്ഞു.
