കുവൈത്ത് സിറ്റി: കുവൈത്ത് അന്താരാഷ്ട്ര വിമാനത്താവളത്തിന് നേരെയുണ്ടായ ഇറാന്റെ ആക്രമണത്തില് നിരവധി പേര്ക്ക് പരിക്ക്. ആക്രമണത്തില് ടി വണ് യാത്രാ ടെര്മിനലിന് കേടുപാടുകള് സംഭവിച്ചു. പ്രതിരോധ മന്ത്രാലയത്തിന്റെ ഔദ്യോഗിക വക്താവ് ബ്രിഗേഡിയര് ജനറല് സൗദ് അബ്ദുല്അസീസ് അല്-ഒതൈബിയാണ് ഇക്കാര്യം അറിയിച്ചത്. ആക്രമണത്തെ തുടര്ന്ന് വിമാന സര്വീസുകള് നിര്ത്തിവെച്ചു. എയര്പോര്ട്ടിലെ വിമാനങ്ങള് മാറ്റി.
ആക്രമണത്തെ തുടര്ന്ന് ടെര്മിനല് കെട്ടിടത്തിന് കാര്യമായ നാശനഷ്ടമുണ്ടായതായും നിരവധി പേര്ക്ക് പരിക്കേറ്റതായും അദ്ദേഹം പറഞ്ഞു. പരിക്കേറ്റവര്ക്ക് ആവശ്യമായ ചികിത്സ നല്കിയിട്ടുണ്ടെന്നും വ്യക്തമാക്കി. സാഹചര്യങ്ങള് സായുധ സേന ബന്ധപ്പെട്ട അധികാരികളുമായി ചേര്ന്ന് നിരീക്ഷിച്ചുവരികയാണെന്നും ഏത് അടിയന്തര സാഹചര്യവും നേരിടാന് സേന പൂര്ണ സജ്ജതയിലാണെന്നും വക്താവ് പറഞ്ഞു. രാജ്യത്തിന്റെ സുരക്ഷയും സ്ഥിരതയും സംരക്ഷിക്കുന്നതിനാവശ്യമായ എല്ലാ നടപടികളും സ്വീകരിച്ചുവരികയാണെന്നും അദ്ദേഹം കൂട്ടിച്ചേര്ത്തു. നേരത്തെയുള്ള ഇറാന്റെ ആക്രമണത്തില് കേടുപാടുകള് സംഭവിച്ചതിനെ തുടര്ന്ന് അടച്ചിട്ടിരുന്ന ടി വണ് ടെര്മിനല് ജൂണ് ഒന്നനാ്ണ് നവീകരണ പ്രവര്ത്തനങ്ങള് പൂര്ത്തിയാക്കി പ്രവര്ത്തനം പുനരാരംഭിച്ചത്.
ഹോര്മുസ് കടലിടുക്കിലെ ഇറാന്റെ ക്വിഷം ദ്വീപിന് നേരെ അമേരിക്കന് സൈന്യം ആക്രമണം നടത്തിയതിന് പിന്നാലെ കുവൈത്തിലെയും ബഹ്റൈനിലെയും യുഎസ് സൈനിക താവളങ്ങള് ഇറാന് ആക്രമിച്ചിരുന്നു. വന്തോതില് ബാലിസ്റ്റിക് മിസൈലുകളും ഡ്രോണുകളും ഉപയോഗിച്ച് ആക്രമണം നടത്തിയെന്നാണ് വിവരം. ഇതേത്തുടര്ന്ന് ഗള്ഫ് മേഖലയിലാകെ അതീവ ജാഗ്രതാ നിര്ദ്ദേശം പുറപ്പെടുവിച്ചു. ക്വിഷം ദ്വീപിലെ തങ്ങളുടെ മിലിട്ടറി ഗ്രൗണ്ട് കണ്ട്രോള് സ്റ്റേഷന് നേരെ അമേരിക്ക നടത്തിയ ആക്രമണത്തിന് പ്രതികാരമായാണ് കുവൈത്തിലെ യുഎസ് താവളങ്ങള്ക്ക് നേരെ ആക്രമണം നടത്തിയതെന്ന് ഇറാന്റെ ഇസ്ലാമിക് റെവല്യൂഷണറി ഗാര്ഡ് കോര്പ്സ് സ്ഥിരീകരിച്ചു. 'അമേരിക്കന് ഭീകരസേനയുടെ കടുത്ത അഹങ്കാരത്തിനും ആക്രമണത്തിനും' ഉള്ള മറുപടിയാണിതെന്ന് ഇറാന് മാധ്യമങ്ങള് റിപ്പോര്ട്ട് ചെയ്തു.
