ഏഴാമത് ചാലിയാര്‍ റിവര്‍ പാഡില്‍ നവംബര്‍ 12 മുതല്‍
ഏഴാമത് 'ചാലിയാര്‍ റിവര്‍ പാഡില്‍ 2021' നവംബര്‍ 12 മുതല്‍ 14 വരെ നടക്കും. ജെല്ലി ഫിഷ് വാട്ടര്‍ സ്പോര്ട്സ് കേരള വിനോദ സഞ്ചാര വകുപ്പമായി ചേര്‍ന്നാണ് ജലോത്സവം ഒരുക്കുന്നത്. നിലമ്പൂരില്‍ നിന്ന് തുടങ്ങി് 68 കിലോ മീറ്റര്‍ പിന്നിട്ട് ബേപ്പൂരില്‍ സമാപിക്കും.യുവാക്കളെയും മുതിര്‍ന്നവരെയും നദികളുമായി ബന്ധിപ്പിച്ച് പ്ലാസ്റ്റിക്കിനെതിരെ ബോധവത്ക്കരണം ശക്തമാക്കുകയും, ഉള്‍നാടന്‍ പരിസ്ഥിതി സംരക്ഷണം ഉയര്‍ത്തിപ്പിടിക്കുകയുമാണ് ജലമേളയുടെ ഉദ്ദേശ ലക്ഷ്യം. രാജ്യത്തിന്റെ വിവിധ ഭാഗങ്ങളില്‍ നിന്നുള്ള നൂറോളം പേര് തുഴച്ചിലില്‍ പങ്കാളികളാവും. കയാക്കുകള്‍ക്കു പുറമെ, ചങ്ങാടങ്ങള്‍, സ്റ്റാന്റ് അപ്പ് പെഡല്‍ (എസ്യുപി) എന്നിവയും തുഴച്ചിലിനായി ഒരുക്കിയിട്ടുണ്ട്. മൂന്നാം ദിവസം കടലില്‍ ഒരുക്കുന്ന സ്‌കള്ളിംഗ്, ഡിങ്കി സെയിലിംഗ് ബോട്ട് റൈസ് എന്നിവ കാണികള്‍ക്ക് ആവേശം പകരും.
തുടക്കക്കാര്‍, നീന്തലറിയാത്തവര്‍, ജലകായിക പ്രേമികള്‍, വിനോദ സഞ്ചാരികള്‍, കുട്ടികള്‍ തുടങ്ങി സമൂഹത്തിന്റെ നാനാതുറകളില്‍ ഉള്ളവരും ജലമേളയില്‍ പങ്കാളികളാവും
നമ്മുടെ നദികള്‍, അതിന്റെ സൗന്ദര്യം, മലബാറിന്റെ ഭക്ഷണ പെരുമ, രുചി വൈവിധ്യം, പ്രാദേശിക കലാരൂപങ്ങള്‍ എന്നിവ കേരളത്തിനു പുറത്തേക്ക് എത്തിക്കുക, അതു വഴി പുതിയ സംരഭങ്ങള്‍ക്ക് വഴിയൊരുക്കുക എന്നിവയും ചാലിയാര്‍ റിവര്‍ പാഡിലിന്റെ ലക്ഷ്യമാണ്. തുഴച്ചിലുകാരുടെ വിശ്രമ കേന്ദ്രങ്ങളിലെ വൈകുന്നേരങ്ങള്‍ പ്രാദേശിക ബാന്റുകളുടെ സംഗീത വിരുന്നിനാല്‍ സമ്പന്നമാകും. കോവിഡ് മാനദണ്ഡങ്ങള്‍ കര്‍ശനമായി പാലിച്ചുകൊണ്ടായിരിക്കും തുഴച്ചില്‍ സംഘടിപ്പിക്കുന്നത്. ഇവന്റില്‍ പങ്കെടുക്കുന്നവര്‍ ഒരു ഡോസ് കോവിഡ് വാക്‌സിനേഷനെങ്കിലും എടുത്തിരിക്കണം. തുഴച്ചില്‍ സമയത്ത് തുഴച്ചിലുകാര്‍ നദികളിലെ പ്ലാസ്റ്റിക് മാലിന്യങ്ങള്‍ കൂടി ശേഖരിക്കും. ബാഗില്‍ ശേഖരിക്കുന്ന പ്ലാസ്റ്റിക് മാലിന്യങ്ങള്‍ സംസ്കരണ കേന്ദ്രങ്ങളിലേക്ക് കൈമാറും.
ജലോത്സവത്തില്‍ പങ്കെടുക്കുന്നവര്‍ക്ക് മാലിന്യങ്ങളുടെ ശരിയായ വേര്‍തിരിവ്, ഉത്തരവാദിത്വ ഉപഭോഗം, മാലിന്യ സംസ്‌കരണം എന്നിവയില്‍ തുഴച്ചിലുകാരും സംഘാടകരും ബോധവത്ക്കരണവും നല്‍കും. പരിസ്ഥിതിയെക്കുറിച്ചും പ്രത്യേകിച്ച് നദിയിലെ വ്യാപകമായ പ്ലാസ്റ്റിക് മലിനീകരണത്തെക്കുറിച്ചും ബോധവല്‍ക്കരണം നടത്തുന്നതിനൊപ്പം കോവിഡ് മഹാമാരിയില്‍ തകര്‍ന്ന കേരള ടൂറിസം മേഖലയെ കരകയറാന്‍ സഹായിക്കുകയാണ് ചാലിയാര്‍ റിവര്‍ പാഡിലിന്റെ ലക്ഷ്യമെന്ന് ജെല്ലിഫിഷ് വാട്ടര്‍ സ്പോര്ട്സ് സ്ഥാപകന്‍ കൗശിഖ് കൊടിത്തൊടിക പറഞ്ഞു. കൂടുതല്‍ വിവരങ്ങള്‍ക്കും രജിസ്ട്രേഷനും www.jellyfishwatersports.com സന്ദര്‍ശിക്കാം.
