ദില്ലി: മുതിര്ന്ന കോണ്ഗ്രസ് നേതാവും മുന് കേന്ദ്ര ആഭ്യന്തര മന്ത്രിയുമായ ശിവരാജ് പാട്ടീല് മഹാരാഷ്ട്രയില് അന്തരിച്ചു. 91 വയസ്സായിരുന്നു. ദീര്ഘനാളായി അസുഖബാധിതനായി ലാത്തൂരിലെ വസതിയില് വിശ്രമത്തിലായിരുന്നു അദ്ദേഹം. രാവിലെ 6:30 ഓടെ വീട്ടില് വെച്ചുതന്നെയാണ് മരണം സംഭവിച്ചത്. അര നൂറ്റാണ്ടിലേറെ നീണ്ടു നിന്ന രാഷ്ട്രീയ ജീവിതത്തില് രാജ്യത്തെ പ്രമുഖ പദവികളെല്ലാം വഹിച്ചിട്ടുള്ള നേതാവാണ് ശിവരാജ് പാട്ടില്. മുംബൈ ഭീകാരാക്രമണം നടക്കുമ്പോള് കേന്ദ്ര ആഭ്യന്ത്ര മന്ത്രിയായിരുന്നു അദ്ദേഹം. അക്രമത്തിന്റെ ഉത്തരവിത്തം ഏറ്റെടുത്ത് അന്ന് രാജിവെച്ചിരുന്നു. തുടര്ച്ചയായി 7 തവണ ലാത്തൂര് ലോകസഭാ മണ്ഡലത്തെ പ്രതിനിധീകരിച്ച് ലോക് സഭയിലെത്തി. പഞ്ചാബ് ഗവര്ണര് ഛണ്ഡിഗഡ് അഡ്മിനിസ്ട്രേറ്റര്, വിവിധ ഘട്ടങ്ങളിലായി കേന്ദ്ര മന്ത്രിസഭയിലെ പ്രധാന വകുപ്പുകള്, ലോകസഭാ സ്പീക്കര്, മഹാരാഷ്ട്ര മന്ത്രി തുടങ്ങി നിരവധി പദവികള് അദ്ദേഹം വഹിച്ചിട്ടുണ്ട്. ആരോഗ്യ പ്രശ്നങ്ങളെ തുടര്ന്ന് 2015 മുതല് വിശ്രമത്തിലായിരുന്നു ശിവരാജ് പാട്ടീല്.
ദേശീയ രാഷ്ട്രീയത്തിലും കോണ്ഗ്രസ് രാഷ്ട്രീയത്തിലും ഏറെ സംഭാവനകള് ചെയ്ത നേതാവായിരുന്നു അദ്ദേഹം. പാര്ലമെന്റില് നിരന്തരം പല വിഷയങ്ങള് ഉന്നയിച്ചിരുന്ന ഇദ്ദേഹം നിരവധി തവണ പാര്ലമെന്റിലേക്ക് മത്സരിച്ച് എത്തുകയും ചെയ്തിരുന്നു. 1980ല് പാര്ലമെന്റില് എത്തിയ ശേഷം ശിവരാജ് പാട്ടീല് കേന്ദ്ര മന്ത്രിസഭയിലേക്ക് എത്തുകയും ചെയ്തു. ആദ്യം ഇന്ദിരാഗാന്ധിയുടെ മന്ത്രിസഭയിലും പിന്നീട് രാജീവ്ഗാന്ധിയുടെ മന്ത്രിസഭയിലും അംഗമായിരുന്നു. നെഹ്റു, ഗാന്ധി കുടുംബവുമായി അടുത്ത ബന്ധം പുലര്ത്തിയിരുന്നു. 1991ല് സ്പീക്കറായിരിക്കുമ്പോഴാണ് ലാത്തൂരില് ഭൂകമ്പം ഉണ്ടാകുന്നത്. അപ്പോള് ദുരന്തമുഖത്ത് നേരിട്ടെത്തുകയും രക്ഷാപ്രവര്ത്തനങ്ങള്ക്ക് നേതൃത്വം വഹിക്കുകയും ചെയ്തിരുന്നു.
