ലോകത്തെ സമ്പന്നന്‍മാരുടെ വാച്ച്; വില 131 കോടി രൂപയിലേറെ
കോഴിക്കോട്: ലോകത്തെ വന്‍കിട ആഡംബര വാച്ചു കമ്പനികള്‍. ഈ സ്ഥാനത്ത് ജേക്കബ് ആന്‍ഡ് കൊ കമ്പനിയ്ക്ക് നിര്‍ണായക സാന്നിധ്യമുണ്ട്. 1986 ല്‍ ഡയമണ്ട് ഡിസൈനര്‍ ജേക്കബ് അറബോ സ്ഥാപിച്ച സ്വകാര്യ ജ്വല്ലറിയാണ് പിന്നീട് റിസ്റ്റ് വാച്ച് റീട്ടെയിലറായി വളര്‍ന്ന ജേക്കബ് ആന്‍ഡ് കമ്പനി. ന്യൂയോര്‍ക്ക് നഗരത്തിലെ മാന്‍ഹട്ടനിലാണ് കമ്പനിയുടെ കോര്‍പ്പറേറ്റ് ഓഫീസ്.
കമ്പനി പുറത്തിറക്കുന്ന വാച്ചുകളിലേറെയും ലിമിറ്റഡ് എഡിഷന്‍ വാച്ചുകളാണ്. ഏറ്റവും ശ്രദ്ധേയമായ വാച്ചുകളില്‍ ഒന്നാണ് ബില്ല്യനെയര്‍ വാച്ച്. വില 131 കോടി രൂപയില്‍ ഏറെയാണ്.ലോകമെമ്പാടുമുള്ള വജ്രങ്ങളുടെയും രത്‌നങ്ങളുടെയും എല്ലാം വിലയേറിയ ശേഖരം ജേക്കബ് ആന്‍ഡ് കമ്പനിയ്ക്കുണ്ട്. വാച്ച് നിര്‍മാണത്തിനും ഇവ ഉപയോഗിയ്ക്കുന്നതാണ് വാച്ചുകള്‍ക്ക് ഇത്ര വില ഉയര്‍ത്തുന്നത്.
ഗുണനിലവാരം ഉറപ്പു വരുത്തിയുള്ള വാച്ച് നിര്‍മാണത്തില്‍ സൂക്ഷ്മമായ പരിചരണം ആവശ്യമായ കല്ലുകളുടെ നിറവും ഡിസൈനും പോലും ഒട്ടേറെ ശ്രദ്ധ ചെലുത്തിയാണ് തെരഞ്ഞെടുക്കുക. ആസ്ട്രണോമിയ വാച്ച്, ഗോസ്റ്റ് വാച്ച്, ജിഎംടി വാച്ച് തുടങ്ങി ഒട്ടേറെ ലിമിറ്റഡ് എഡിഷന്‍ വാച്ചുകളാണ് കമ്പനി പുറത്തിറക്കിയിരിക്കുന്നത്. കോടികള്‍ വില മതിയ്ക്കുന്ന വാച്ച് ഉപയോക്താക്കളില്‍ ഏറെയും സെലിബ്രിറ്റികളും കോടീശ്വരന്‍മാരും തന്നെ.
1981- ല്‍ ന്യൂയോര്‍ക്കില്‍ ജ്വല്ലറി ഡിസൈന്‍ കോഴ്സില്‍ ബിരുദം നേടിയ ശേഷം, ജേക്കബ് അറബോ ന്യൂയോര്‍ക്ക് നഗരത്തിലെ ഡയമണ്ട് നഗരത്തില്‍ ഒരു ചെറിയ ബൂത്ത് തുറന്നു. അവിടെ അദ്ദേഹം ജ്വല്ലറികള്‍ക്കും സ്വകാര്യ ക്ലയന്റുകള്‍ക്കുമായി വജ്രാഭരണങ്ങള്‍ രൂപകല്‍പ്പന ചെയ്യാന്‍ തുടങ്ങി.പിന്നീട് അറബോ ഡയമണ്ട് ക്വാസര്‍' എന്ന പേരില്‍ സ്വന്തമായി ഒരു കമ്പനി തുറക്കുകയും ജേക്കബ് & കോ എന്ന പേരില്‍ സ്വന്തം ബ്രാന്‍ഡ് പടുത്തുയര്‍ത്തുകയും ചെയ്തു.
