റെഡ്മി നോട്ട് 10, വരുന്നത് 108 മെഗാപിക്സല് ക്യാമറയുമായി
ചൈനീസ് സ്മാര്ട്ട്ഫോണ് നിര്‍മ്മാതാക്കളായ ഷവോമിയുടെ നിരയില്‍ ഏറെ ആവശ്യക്കാരുള്ള ഫോണാണ് റെഡ്മി നോട്ട്. കഴിഞ്ഞ വര്ഷം മാര്‍ച്ചിലെത്തിയ റെഡ്മി നോട്ട് 9 ഫോണുകളും 2019 മാര്‍ച്ചിലെത്തിയ റെഡ്മി നോട്ട് 8 ഫോണുകളും വമ്പന്‍ വില്‍പ്പനയാണ് നേടിയത്. സ്വാഭാവികമായും അടുത്ത മാസം നാലാം തിയതി ഷവോമി അവതരിപ്പിക്കുന്ന പിന്‍ഗാമി റെഡ്മി നോട്ട് 10-നും ഏറെ വില്പന നേടാനാവും എന്നാണ് കണക്ക് കൂട്ടല്‍. അതിനിനെ റെഡ്മി നോട്ട് 10 ഫോണിനെപ്പറ്റിയുള്ള വിശദാംശങ്ങള്‍ ഷവോമി പുറത്ത് വിട്ടു തുടങ്ങി.
കഴിഞ്ഞ ദിവസം ഒരു ട്വീറ്റിലൂടെ റെഡ്മി നോട്ട് 10-ന് 108 മെഗാപിക്സല് ക്യാമെറയുണ്ടാവും എന്നും ഷവോമി വ്യക്തമാക്കി. ഷവോമിയുടെ ഫോണ്‍ ശ്രേണിയില്‍ കഴിഞ്ഞ മാസം വില്പനക്കെത്തിയ എംഐ 10i 5ജി ആണ് സമാനമായ ക്യാമറയുള്ള മറ്റൊരു ഫോണ്‍. ഇത് അടുത്ത കാലം വരെ പ്രീമിയം സ്മാര്‍ട്ട്‌ഫോണുകള്‍ക്ക് മാത്രമായിരുന്ന മികച്ച കാമറ ഇനി മിഡ്-സെഗ്മെന്റ് ഫോണുകള്‍ക്ക് ലഭിച്ചു തുടങ്ങുകയാണ് എന്നുറപ്പിക്കുന്നു. റെഡ്മി നോട്ട് 10 ഫോണുകള്‍ക്ക് എതിരാളിയായി എത്തുന്ന റിയല്‍മി 8 സീരീസ് ഫോണിനും 108 മെഗാപിക്സല് ക്യാമെറയുണ്ടാവും എന്ന് കമ്പനി വ്യക്തമാക്കിയിട്ടുണ്ട്.
കഴിഞ്ഞ വര്‍ഷമെത്തിയ റെഡ്മി നോട്ട് 9 ശ്രേണിയിലെ പ്രോ മാക്സ് പതിപ്പിന് 64 മെഗാപിക്സല് ക്യാമറയും പ്രോ, സ്റ്റാന്‍ഡേര്‍ഡ് പതിപ്പുകള്‍ക്ക് 48 മെഗാപിക്സല് ക്യാമറയുമായിരുന്നു. അതുകൊണ്ട് തന്നെ റെഡ്മി നോട്ട് 10 പ്രോ മാക്സ് മോഡലിന് മാത്രമായി 108 മെഗാപിക്സല് ക്യാമെറ നിജപ്പെടുത്താനാണ് സാദ്ധ്യത.
റെഡ്മി നോട്ട് 10, റെഡ്മി നോട്ട് 10 പ്രോ, റെഡ്മി നോട്ട് 10 പ്രോ മാക്സ് എന്നിങ്ങനെ 3 പതിപ്പുകള്‍ തുടക്കത്തിലും റെഡ്മി നോട്ട് 10 എസ് എന്നൊരു മോഡല്‍ പിന്നീടും ഷവോമി അവതരിപ്പിക്കും എന്നാണ് റിപോര്‍ട്ടുകള്‍. ആമസോണില്‍ തയ്യാറാക്കിയിരിക്കുന്ന ടീസര്‍ ചിത്രം പുത്തന്‍ റെഡ്മി നോട്ട് ഫോണിന് മികച്ച ക്യാമറയും, മികച്ച റിഫ്രഷ് റേറ്റുള്ള ഡിസ്പ്ലേയുമുണ്ടാവും എന്നുറപ്പിക്കുന്നു. ഷവോമിയുടെ ഗ്ലോബല്‍ വൈസ് പ്രസിഡന്റ് മനു കുമാര്‍ ജെയിനും അടുത്തിടെ ഒരു ട്വീറ്റില്‍ മികച്ച പെര്‍ഫോമന്‍സ് ആയിരിക്കും റെഡ്മി നോട്ട് 10 ഫോണുകളുടെ തുറുപ്പ്ചീട്ട് എന്ന് വ്യക്തമാക്കിയിരുന്നു.
ഇതുവരെ ലഭ്യമായ റിപ്പോര്‍ട്ടുകളുടെ അടിസ്ഥാനത്തില്‍ അടിസ്ഥാന റെഡ്മി നോട്ട് 10 ഫോണിന് 120Hz എല്‍സിഡി ഡിസ്‌പ്ലേ ആയിരിക്കും. സ്‌നാപ്ഡ്രാഗണ്‍ 732G പ്രോസസ്സര്‍ ആയിരിക്കും ഏറ്റവും വിലക്കുറവുള്ള ഈ പതിപ്പില്‍ ഇടം പിടിക്കുക. 4 GB റാം + 64 ജിബി സ്റ്റോറേജ്, 6 ജിബി റാം + 64 ജിബി സ്റ്റോറേജ് എന്നിങ്ങനെ രണ്ട് പതിപ്പുകളില്‍ വില്പനക്കെത്തും എന്ന് പ്രതീക്ഷിക്കുന്ന റെഡ്മി നോട്ട് 10, കുറഞ്ഞ പക്ഷം 3 നിറങ്ങളില്‍ ലഭ്യമാവും. അതെ സമയം അമോലെഡ് ഡിസ്‌പ്ലേ, സ്‌നാപ്ഡ്രാഗണ്‍ 750G SoC പ്രോസസ്സര്‍ എന്നിങ്ങനെ ഫീച്ചറുകള്‍ നിറഞ്ഞതാവും റെഡ്മി നോട്ട് 10 പ്രോ, മാക്സ് പതിപ്പുകള്‍.
